Skagamenn unnu dramatískan sigur á Fylki, 3-2, þegar liðin mættust í Pepsi Max deild karla í knattspyrnu á laugardaginn. Leikið var á Akranesi.

Snemma leiks settu Skagamenn boltann í stöngina en þess utan voru gestirnir hættulegri fram á við í fyrri hálfleik. Þeir komust yfir á 39. mínútu þegar Arnór Gauti Ragnarsson skoraði eftir fyrirgjöf frá Valdimar Ingimundarsyni.

Steinar Þorsteinsson jafnaði fyrir ÍA á 55. mínútu. Hann fékk boltann fyrir utan vítateiginn vinstra megin, sneri inn á miðjuna og sendi hann í stöngina fjær og í netið. Einstaklega laglegt mark hjá Steinari. Skagamenn voru sterkari eftir jöfnunarmarkið og þeir komust yfir á 75. mínútu. Fylkismönnum mistókst að hreinsa eftir hornspyrnu sem endaði með því að boltinn barst á Stefán Teit Þórðarson sem var einn á auðum sjó og átti ekki í vandræðum með að skora úr markteignum. En Fylkismenn voru ekki af baki dottnir og jöfnuðu metin á 84. mínútu, þegar Orri Sveinn Stefánsson skoraði með skalla eftir laglega fyrirgjöf frá Djair Partiff-Williams.

Orri átti eftir að koma meira við sögu á lokamínútum leiksins. Þegar komið var fram í uppbótartíma var boltinn sendur innfyrir vörn Fylkismanna á Tryggva Hrafn Haraldsson, sem var kominn einn á móti markmanni í vítateignum þegar Orri braut á honum. Hlaut hann rautt spjald að launum og Skagamenn fengu vítaspyrnu. Tryggvi fór sjálfur á punktinn, skoraði af miklu öryggi og tryggði Skagamönnum dramatískan sigur, 3-2.

Skagamenn hafa 13 stig í 7. sæti deildarinnar, jafn mörg og Víkingur R. í sætinu fyrir neðan en tveimur stigum á eftir Fylki. Næsti leikur ÍA í deildinni er útileikur gegn KA laugardaginn 22. ágúst næstkomandi. Í millitíðinni mæta þeir hins vegar Val á Hlíðarenda í 16 liða úrslitum Mjólkurbikarsins. Sá leikur verður spilaður annað kvöld, þriðjudaginn 18. ágúst.

Vítaspyrna í uppbótartíma réði úrslitum