Víkingur Ó. beið lægri hlut gegn Þrótti R. á heimavelli, 1-2, þegar liðin mættust í 1. deild karla í knattspyrnu á laugardagskvöld. Var þetta fyrsti sigur Þróttar í deildinni í sumar.

Ólafsvíkingar fengu prýðilegt færi strax í upphafi leiksins. Ívar Reynir Antonsson fékk þá boltann á fjærstöng eftir fyrirgjöf, átti gott skot að marki sem Franco Lalic í marki Þróttara varði vel. Bæði lið sýndu annars ágætis tilburði framan af fyrri hálfleik. Þróttarar fengu dauðafæri á 25. mínútu þegar Oliver Heiðarsson slapp einn í gegn en Brynjar Atli Bragason varði vel frá honum.

Ísinn var brotinn á 33. mínútu leiksins þegar Esau Rojo Martinez kom Þrótti yfir. Hann fékk boltann í teignum eftir fyrirgjöf og potaði honum í stöngina, tók síðan sitt eigið frákast og kom því yfir línuna.

Ólafsvíkingar voru öflugri eftir að hafa lent undir og náðu að jafna metin á lokamínútu fyrri hálfleiks. Harley Willard fékk þá boltann eftir vandræðagang í vörn gestanna, fór framhjá nokkrum varnarmönnum og lagði boltann snyrtilega í hornið fjær.

Snemma í fyrri hálfleik kom síðan markið sem átti eftir að ráða úrslitum. Oliver Heiðarsson fékk boltann úti vinstra megin, geystist fram völlinn. Varnarmenn Víkings virtust vera að bíða eftir fyrirgjöfinni og bökkuðu frá honum, en Oliver setti boltann bara fast í hornið og kom Þrótti yfir.

Víkingar voru ívið sterkari það sem eftir lifði leiks en tókst ekki að skapa sér nein alvöru tækifæri til að jafna metin. Leiknum lauk því með sigri gestanna, 1-2.

Víkingur Ó. situr í 10. sæti deildarinnar með níu stig eftir níu leiki, stigi á eftir Leikni F. en með fimm stiga forskot á Þrótt. Næsti leikur Ólafsvíkinga er útileikur gegn Keflavík miðvikudaginn 19. ágúst.

Þurftu að lúta í gras á heimavelli