Knattspyrnusamband Íslands hefur opinberað drög að reglugerð sem á að sjá til þess að hægt verði að halda Íslandsmótinu áfram á tímum farsóttar. Þar er að finna mjög ítarlegar og strangar sóttvarnarreglur sem fara ber eftir á leikdögum.

Í reglugerðinni segir meðal annars að leikmönnum, þjálfurum og öðrum starfsmönnum sé óheimilt að fagna skoruðum mörkum með snertingu. Lið skulu bera andlitsgrímur í búningsklefum og ekki dvelja þar lengur en 30-40 mínútur í senn fyrir eða eftir leiki. Ef leikmenn og dómarar nota sturtur eftir leik skal tryggja tveggja metra fjarlægðarmörk.

Liðin ganga út á völlinn í sitthvoru lagi, fyrst heimalið og svo gestalið. Heimaliði ber að tryggja að allir sem sitja á varamannabekkjum geti haldið tveggja metra bili milli manna. Óheimilt verður að hrækja á völlinn og nágrenni hans og markvörðum verður bannað að hrækja í hanskana sína.

Hverju félagi verður gert að skipa sérstakan sóttvarnarfulltrúa sem ber ábyrgð á að farið verði eftir reglum KSÍ. Hann hefur heimild til að vísa á brott þeim sem ekki fara eftir þeim. Óheimilt verður að deila drykkjarílátum eða mataráhöldum og sóttvarnarfulltrúa ber að tryggja að leikmenn hafi meðferðis eigin vatnsbrúsa. Þá verður heimaliði óheimilt að útvega gestaliði, dómurum og fjölmiðlum veitingar. Tryggja skal að allar veitinga sem þessir aðilar taka með sér séu í lokuðum umbúðum.

Hér hefur aðeins verið farið yfir fáein atriði sem fram koma í reglugerðinni. Hana má lesa í heild sinni á vef KSÍ og ítrekað er að hún hefur ekki tekið gildi, enda hefur mótahaldi verið frestað til 13. ágúst. En eins og fram kom á upplýsingafundi almannavarna á mánudag er til skoðunar að hefja leik í Íslandsmótinu í knattspyrnu að nýju. Nýjar reglur um framkvæmd knattspyrnuleikja með tilliti til sóttvarna eru forsenda þess að málið hafi verið tekið til skoðunar, að því er fram kemur á vef KSÍ. Stefnt er að því að staðfesta reglurnar af stjórn KSÍ næstu daga, en ákvörðun um áframhald Íslandsmótsins í knattspyrnu liggur eftir sem áður hjá heilbrigðisráðherra.

Bannað að fagna með snertingu