Liðsmenn ÍA máttu sætta sig við tap 1-2 gegn Stjörnunni þegar liðin mættust í Pepsi Max deild karla í knattspyrnu. Leikið var á Akranesvelli í gærkvöldi.

Eftir jafnan baráttuleik framan af fyrri hálfleik komust Stjörnumenn yfir á 23. mínútu. Þeir áttu hornspyrnu frá vinstir sem Skagamenn skölluðu frá markinu. Boltinn barst utarlega í vítateiginn, hægra megin, þar sem Eyjólfur Héðinsson tók hann viðstöðulaust á lofti og hamraði í fjærhornið. Glæsilegt mark og Garðbæingar komnir yfir.

Leikurinn var nokkuð opinn eftir fyrsta markið, þar sem bæði lið sköpuðu sér ágæt marktækifæri. Gestirnir bættu öðru marki við á 40. mínútu leiksins. Heiðar Ægisson sendi boltann frá endamörkum vinstra megin, rétt út fyrir vítateig þar sem Alex Þór Hauksson skaut viðstöðulausu skoti með jörðinni sem fór í stöngina og inn.

Besta færi Skagamanna í fyrri hálfleik kom á lokamínútunni. Brynjar Snær Pálsson sendi boltann fyrir markið á Stefán Teit Þórðarson sem skaut frá markteigshorninu en Haraldur Björnsson kom vel út úr marki sínu og varði frá honum.

Skagamenn voru heldur sterkari í upphafi síðari hálfleiks og minnkuðu muninn á 58. mínútu leiksins. Marcus Johansson kom með boltann upp úr vörninni, sendi á Aron Kristófer Lárusson á spretti upp vinstri kantinn. Hann fór glæsilega framhjá tveimur varnarmönnum og sendi boltann fyrir markið á Viktor Jónsson sem kom honum í netið.

Gestirnir voru heldur sterkari eftir markið og litlu munaði að Eyjólfur skoraði sitt annað mark á 65. mínútu þegar hann átti hörkuskot í stöngina. Á 78. mínútu fékk Gísli Laxdal Unnarsson dauðafæri til að jafna metin. Hann fékk langa sendingu inn í markteiginn hægra megin en skaut lausu skoti beint á Harald í markinu. Aron Kristófer átti skot yfir markið þegar komið var fram í uppbótartíma og var það síðasta marktækifæri Skagamanna. Leiknum lauk með sigri Stjörnunnar, 1-2.

Eftir tapið sitja Skagamenn í 8. sæti deildarinnar með tíu stig eftir átta leiki, stigi á eftir Breiðabliki og FH en með tveggja stiga forskot á HK. Blikar eru næstu mótherjar ÍA í deildinni, liðin mætast á Kópavogsvelli á sunnudagskvöld, 26. júlí næstkomandi.

Skagamenn töpuðu gegn Stjörnunni