Víkingur Ó. lék sinn fyrsta leik undir stjórn Guðjóns Þórarsonar þegar liðið mætti Leikni R. í 1. deild karla í knattspyrnu. Leikið var á Leiknisvelli í gærkvöldi. Ólafsvíkingar fengu enga draumabyrjun undir stjórn nýs þjálfara. Þvert á móti voru það heimamenn sem réðu lögum og lofum inni á vellinum og sigruðu að lokum með fimm mörkum gegn engu.

Leiknismenn byrjuðu af krafti og sóttu hart að Ólafsvíkingum í upphafi leiks. Þeir uppskáru mark strax á 12. mínútu, þegar Vuk Oskar Dimitrjevic skoraði eftir hraða sókn og sendingu frá hægri. Ólafsvíkingar áttu eina og eina álitlega sókn en tókst ekki að skapa sér nein alvöru marktækifæri það sem eftir lifði fyrri hálfleiks. Heimamenn komust í 2-0 á 37. mínútu þegar Sævar Atli magnússon skoraði með skoti úr vítateignum og þannig var staðan í hálfleik.

Síðari hálfleikur byrjaði með látum því Leiknismenn skoruðu sitt þriðja mark strax á 48. mínútu. Þar var á ferðinni Gyrðir Hrafn Guðbrandsson, sem stangaði boltann í netið eftir hornspyrnu. Fjórða mark leiksins kom síðan á 65. mínútu. Leiknismenn léku vel upp völlinn þar til boltinn barst fyrir fætur Sólons Breka Leifssonar sem skoraði með góðu skoti af vítateigslínunni. Leiknismenn innsigluðu síðan 5-0 sigur sinn á 74. mínútu þegar Arnór Ingi Kristinsson sendi boltann upp í samskeytin úr vítateignum, þegar hann fylgdi eftir skoti sem hafði farið í varnarmann.

Það sem eftir lifði var leikurinn mjög tíðindalítill. Hvorugt lið skapaði sér marktækifæri og leiknum lauk því með 5-0 stórsigri Leiknis.

Víkingur Ó. situr í 10. sæti deildarinnar með sex stig eftir sex leiki. Ólafsvíkingar hafa fimm stiga forskot á Þrótt R. í fallsætinu fyrir neðan, en eru stigi á eftir Leikni F. í sætinu fyrir ofan. Fáskrúðsfirðingar eru einmitt næstu mótherjar Ólafsvíkinga. Liðin mætast á Ólafsvíkurvelli næstkomandi sunnudag, 26. júlí.

Ólafsvíkingar burstaðir