Lið Skallagríms og Ísbjarnarins skildu jöfn þegar þau mættust í sjöundu umferð fjórðu deildar knattspyrnu karla á Skallagrímsvelli í gærkvöldi. Í síðustu umferð tapaði Skallagrímur gegn Hamarsmönnum en Ísbjörninn gerði jafntefli gegn KFB.

Leikurinn var jafn allan tíman og mikið boltahnoð einkenndi leikinn. Liðin skiptust á að senda knöttinn sín á milli en hvorugt náði að sækja af einhverri alvöru. Furðulegt atvik átti sér stað á 40. mínútu. Þá fékk Vladimir Panic, leikmaður Ísbjarnarins, gult spjald fyrir brot. Flóð af tuði frá gestunum rigndi yfir dómarann sem endaði með rauðu spjaldi á samherja Vladimir, David Jean Ibarra, sem þurfti að víkja af velli. Leikur hófst loks að nýju, Ísbjörninn einum manni færri, en eitthvað hafa Borgnesingar ekki verið búnir að stilla sig aftur inn í leikinn því einni mínútu síðar skoraði Orats Reta Garcia og kom gestunum yfir. Héldu þeir forystunni þegar flautað var til leikhlés.

Liðin héldu uppteknum hætti í síðari hálfleik. Sendu boltann mikið á milli sín án þess að ógna marki andstæðingsins að ráði. Þegar líða tók á leikinn fóru heimamenn að pressa og sækja meira á gestina. Stundarfjórðungur var til leiksloka þegar Sigurjón Ari Guðmundsson skoraði með föstum skalla sem söng í neti gestanna. Skallagrímsmenn fengu svo dauðafæri rétt undir lokin en spyrnan fór langt framhjá rammanum. Lokaniðurstaðan 1-1 og liðin með sitthvort stigið í vasanum.

Nú þegar sjö umferðir eru búnar í C riðli fjórðu deildar eru Skallagrímsmenn í þriðja sæti með 13 stig og Ísbjörninn rétt á eftir í fjórða sæti með 12 stig.

Næsti leikur Skallagríms verður úti gegn Samherjum miðvikudaginn 29. júlí kl. 19:00.

: Ljósm. glh.

: Ljósm. glh.

: Hart barist í háloftunum. Ljósm. glh.

: Guðmundur Björn Þorbjörnsson gerir sig kláran fyrir hornspyrnu. Ljósm. glh.

: Sölvi G. Gylfason er spilandi þjálfari Skallagríms.

: Fastur skalli sem söng í neti gestanna. Ljósm. glh.

Jafntefli á Skallagrímsvelli í gær