Víkingur Ó. mátti sætta sig við tap gegn Aftureldingu, 1-3, þegar liðin mættust í 1. deild karla í knattspyrnu á föstudagskvöld. Leikið var á Ólafsvíkurvelli. Brynjar Kristmundsson stýrði liðinu í leiknum en Guðjón Þórðarson, nýráðinn þjálfari Ólafsvíkinga, fylgdist með úr stúkunni. Hann mun síðan stýra liðinu frá og með næsta leik.

En aftur að leik föstudagsins. Það voru gestirnir úr Mosfellsbæ sem komust yfir strax á 5. mínútu leiksins eftir laglegt þríhyrningaspil sem lauk með því að Kári Steinn Hlífarsson lagði boltann á Jason Daða Svanþórsson sem skoraði. Eftir að hafa fengið smá skell í upphafi komust Ólafsvíkingar betur inn í leikinn eftir því sem leið á. Bæði lið fengu tækifæri til að skora en allt kom fyrir ekki, allt þar til hálftími var liðinn. Þá bættu gestirnir öðru marki við. Mikill usli skapaðist í vítateig Víkings eftir hornspyrnu. Að lokum skoppaði boltinn út úr teignum vinstra megin, fyrir fætur Kristjáns Atla Marteinssonar sem þrumaði honum í hornið fjær. Afturelding leiddi þannig með tveimur mörkum gegn engu þegar flautað var til hálfleiks.

Jafnræði var með liðunum í upphafi síðari hálfleiks, en eftir því sem leið á tóku Ólafsvíkingar stjórnina. Þeir héldu boltanum vel en gekk erfiðlega að að skapa sér ákjósanleg marktækifæri. Það var ekki fyrr en undir lok leiks að Víkingur komst á blað. Vítaspyrna var dæmd á Aftureldingu og fyrirliðinn Emir Dokara fór á punktinn. Hann var ekkert að tvínóna við hlutina heldur þrumaði boltanum í slána og inn. En gestirnir áttu lokaorðið og innsigluðu 1-3 sigur sinn þegar komið var fram í uppbótartíma. Brynjar Atli Bragason varði með tilþrifum eftir usla í vítateig Víkings, en boltinn barst á Valgeir Árna Svansson sem potaði boltanum yfir línuna.

Víkingur Ó. situr sem stendur í 9. sæti deildarinnar með sex stig eftir sex leiki, jafn mörg og Leiknir F. í sætinu fyrir neðan en þremur stigum á eftir liðunum fyrir ofan. Næsti leikur Ólafsvíkinga er útileikur gegn Leikni R. í kvöld, miðvikudaginn 22. júlí.

Töpuðu á heimavelli