Skagamenn máttu sækja knöttinn sex sinnum í netið þegar þeir heimsóttu Víking R. í Pepsi Max deildinni í gærkvöldi. Staðan var 2-1 í hálfleik og leikurinn galopinn, en í þeim síðari tóku heimamenn öll völd á vellinum og sigruðu að lokum 6-2.

Fyrst dró til tíðinda á 23. mínútu leiksins þegar Víkingur fékk vítaspyrnu eftir að Aron Kristófer Lárusson braut á Davíð Erni Atlasyni í teignum. Óttar Magnús Karlsson fór á punktinn og skoraði með föstu lágu skoti í hornið vinstra megin. Árni Snær Ólafsson hafði hönd á boltanum en hafði ekki erindi sem erfiði. Á 37. bættu heimamenn öðru marki við. Kári Árnason skallaði boltann inn á markteit eftir hornspyrnu. Þar reis Davíð Örn hæst í teignum og skallaði boltann í netið. Varnarmenn Víkings skölluðu hornspyrnu út í teiginn. Þar féll boltinn fyrir Stefán Teit Þórðarson sem hamraði hann í þverslá og inn. Staðan í hálfleik var 2-1 og leikurinn galopinn.

Víkingar gerðu að kalla út um leikinn með tveimur mörkum snemma í síðari hálfleik. Nikolaj Hansen skoraði það fyrra með laglegri vippu á 51. minútu eftir góða sendingu frá Atla Barkarsyni. Aðeins mínútu síðar sendu Víkingar boltann upp völlinn. Árni Snær kom langt út úr markinu en hitti ekki boltann svo hann féll fyrir Erling Agnarsson sem fór framhjá Marcusi Johansen og lagði hann í autt markið. Staðan orðin 4-1 fyrir Víking. En Skagamenn voru ekki af baki dottnir og minnkuðu muninn í 4-2 á 59. mínútu leiksins. Brynjar Snær Pálsson sendi boltann inn í teiginn á Hlyn Sævar Jónsson sem var einn og óvaldaður í teignum og setti boltann í netið með fyrstu snertingu sinni eftir að hafa komið inn á sem varamaður.

Skagamönnum tókst þó ekki að minnka muninn í leiknum frekar, þvert á móti áttu heimamenn eftir að auka forskot sitt. Ágúst Eðvald Hlynsson kom Víkingi í 5-2 á 66. mínútu með góðu skoti af vítateigslínunni eftir sendingu frá Nikolaj Hansen. Ágúst skoraði síðan annað mark sitt og sjötta mark Víkings á 79. mínútu þegar boltinn féll fyrir hann á fjærstöng eftir skot í varnarmann. Það var síðasta mark leiksins, sem lauk með 6-2 sigri Víkings.

Skagamenn sitja í 7. sæti deildarinnar með tíu stig eftir sjö leiki, jafn mörg og Stjarnan í sætinu fyrir og FH-ingar í sætinu fyrir neðan, en hafa leikið fleiri leiki. Næst reima Skagamenn á sig skóna fimmtudaginn 23. júlí þegar þeir fá Stjörnumenn í heimsókn á Akranes.

Skagamenn fengu skell á Víkingsvelli