Kvennalið ÍA þurfti að lúta í lægra haldi gegn sterku liði Keflavík þegar liðin mættust í Reykjanesbæ í fimmtu umferð fyrstu deildar kvenna í knattspyrnu í gær.

Skagakonur hafa átt erfitt uppdráttar með að sigla sigrum í höfn það sem af er móti. Fyrir viðureignina voru þær með þrjú jafntefli og einungis einn sigur að baki. Keflavík aftur á móti hefur verið á sigurgöngu á mótinu, þrír sigrar og eitt jafntefli áður en þær tóku á móti ÍA á heimavelli í gærkvöldi.

Keflvíkingar komu ákafar til leiks og pressuðu ÍA fast upp völlinn og þrýstu vel á varnarlínu þeirra gulklæddu sem héldu haus. Á lokamínútu fyrri hálfleiks náði Marín Rún Guðmundsdóttir að koma knettinum yfir marklínu Skagakvenna af 7 metra færi sem var jafnframt síðasta spyrna hálfleiksins og heimastúlkur því með eins mark forskot þegar liðin gengu til hlés.

Skagakonur komu einbeittar í seinni hálfleik og pressuðu vel á heimastúlkur framan af hálfleiknum. Ekki dugði það til þar sem Keflavík bætti við tveimur mörkum eftir um tuttugu mínútna spilamennsku. Staðan allt í einu orðin 3-0. ÍA sýndi smá líflínu á 70. mínútu þegar Fríða Halldórsdóttir sendi boltann í bláhornið og minnkaði muninn í 3-1.

Skagakonur reyndu hvað þær gátu til að ná heimastúlkum en voru óheppnar að skora ekki fleiri mörk en alls fengu þær gulklæddu 14 hornspyrnur á móti þremur hjá Keflavík. Keflavík bætir því fjórða sigrinum á tímabilinu við sig á meðan ÍA situr eftir með sárt ennið.

Eftir fimm umferðir heldur Keflavík efsta sætinu í fyrstu deild kvenna með 13 stig. ÍA situr kyrr í fimmta sæti deildarinnar með sex stig.

Næsti leikur Skagakvenna verður gegn Augnabliki á Akranesi mánudaginn 20. júlí kl. 19:15.

Alls voru 17 hornspyrnur teknar í leiknum. Þar af tók ÍA 14. sas.

ÍA konur tapa fyrir toppliðinu