core/freeform

Leiknismenn voru of stór biti fyrir Kára, en liðin mættust í annarri umferð Mjólkurbikars karla í knattspyrnu á föstudagskvöld. Kári leikur sem kunnugt er í 2. deild en Leiknir R. í deildinni fyrir ofan. Aðstæður voru erfiðar í Reykjavík þegar leikurinn fór fram, rigning og rok. Leiknismenn stjórnuðu gangi mála en Káramenn virtust eiga erfitt með aðstæðurnar og gekk illa að byggja upp sínar sóknir. Að lokum fór svo að heimamenn unnu stórsigur, 5-0. Þeir komust yfir á 31. mínútu þegar Máni Austmann Hilmarsson skoraði eftir vandræðagang í vítateig Káramanna og staðan 1-0 í hálfleik.

Leiknismenn byrjuðu seinni hálfleikinn af krafti og gerðu út um leikinn með mörkum Daníels Finns Matthíassonar og Sævars Atla Magnússonar á 57. og 60. mínútu. Ekki vænkaðist hagur Káramanna þegar Ólafur Karel Eiríksson var rekinn út af með rautt spjald á 70. mínútu eftir klaufalegt brot, en Ólafur var þá nýkominn inn á sem varamaður. Káramenn náðu þó ágætum leik á köflum eftir þetta, en það tók að draga af þeim eftir því sem styttist í annan endann á leiknum. Daníel Finns bætti fjórða marki Leiknis við á 86. mínútu og innsiglaði síðan 5-0 sigur heimamanna með marki úr vítaspyrnu tveimur mínútum fyrir leikslok.

Káramenn hafa því lokið þátttöku sinni í Mjólkurbikar karla þetta sumarið. Næsta verkefni Kára er fyrsti leikur liðsins í 2. deildinni. Kári mætir lærisveinum Deans Martins í Selfossi í Akraneshöllinni í dag, þjóðhátíðardaginn 17. júní.

medium

Fréttaveita Vesturlands

Kári úr leik í bikarnum