Bikarkeppni Vesturlands – gæðingakeppni, verður haldin á félagssvæði Borgfirðings dagana 13.-14. júní næstkomandi. Er keppnin lokuð öðrum en félögum í hestamannafélögum á Vesturlandi; Dreyra, Borgfirðingi, Glaði og Snæfellingi. Mótið er jafnframt gæðingakeppni Borgfirðings, Snæfellings og Dreyra.

Keppt verður í eftirtöldum greinum og flokkum:

A flokkur gæðinga – 1. flokkur

A flokkur gæðinga – 2. flokkur

B flokkur gæðinga – 1. flokkur

B flokkur gæðinga – 2. flokkur.

Ungmennaflokkur

Unglingaflokkur

Barnaflokkur

Þessu til viðbótar verður keppt í tveimur tilraunagreinum. Niðurstöður þeirra birtast ekki í WorldFeng eða Kappa og flokkarnir eru aðeins til að halda utan um skráningu. Flokkarnir eru: gæðingatölt (skráð sem T3 í SportFeng – 1. flokkur – 2. flokkur og 17 ára og yngri, unglingaflokkur) og gæðingakeppni – skráð sem gæðingaskeið PP2 í SportFeng – opinn flokkur.

Skráningargjöld eru kr. 5.000 í fullorðinsflokkum og kr. 2.500 í öðrum flokkum. Fyrirspurnum og beiðnum um aðstoð má koma á framfæri í gegnum netfangið borgfirdingur@borgfirdingur.is. Skráning í gegnum SportFeng, mótshaldari er Borgfirðingur.

Skráningafrestur rennur út kl. 23:59 á þriðjudagskvöld, 9. júní. Mótanefnd áskilur sér rétt til að fella niður keppni í þeim flokkum sem viðunandi skráning næst ekki.

Hvað varðar tilraunagreinarnar verða dæmd fjögur atriði í flokki 17 ára og yngri; hægt tölt, stjórnun og áseta á hægu tölti, fegurðartölt frjáls hraði og stjórnun á fegurðartölti frjáls ferð. Í opnum flokki minna vanra verða dæmd fjögur atriði; hægt tölt, fegurðartölt frjáls hraði, vilji og feburð í reið X2. Í opnum flokki meira vanra verða dæmd fjögur atriði; hægt tölt, tölt með hraðamun, vilji og fegurð í reið X2. Leyfður verður meiri hraði á hægu tölti en í hefðbundinni töltkeppni. Keppt í skeiði eins og í A flokki, þrír dómarar dæma skeið. Einkunn fyrir tíma er helmingur á móti dómaraeinkunn. Tveir sprettir, betri sprettur gildir.

Bikarkeppni Vesturlands framundan