Snæfellskonur unnu Grindavík örugglega, 79-65, þegar liðin mættust í Domino‘s deild kvenna í körfuknattleik. Leikið var í Stykkishólmi í gærkvöldi og það voru Snæfellskonur sem höfðu yfirhöndina nánast frá fyrstu mínútu.

Leikurinn fór heldur rólega af stað. Snæfellskonur leiddu 6-5 þegar fyrsti leikhluti var hálfnaður. Eftir það náðu þær góðum kafla, skoruðu 13 stig gegn fimm og leiddu með níu stigum eftir upphafsfjórðunginn, 19-10. Snæfell jók forystu sína jafnt og þétt framan af öðrum leikhluta og enduðu fyrri hálfleikinn á góðum kafla. Það skilaði liðinu 20 stiga forystu í hléinu, 42-22 og Hólmarar með pálmann í höndunum.

Munurinn á liðunum hélst meira og minna óbreyttur allan þriðja leikhlutann. Snæfell leiddi 66-45 fyrir lokafjórðunginn og aðeins formsatriði að klára leikinn. Grindavík náði aðeins að laga stöðuna í fjórða leikhlutanum en það breytti engu um úrslitin. Snæfell stjórnaði ferðinni allan leikinn og sigraði að lokum með 14 stigum, 79-65.

Emese Vida var stigahæst í liði Snæfells með 16 stig og ellefu fráköst að auki. Veera Pirttinen skoraði 15 stig og tók fimm fráköst, Anna Soffía Lárusdóttir og Amarah Colemans skoruðu 13 stig hvor, Gunnhildur Gunnarsdóttir var með sjö stig, Helga Hjördís Björgvinsdóttir og Tinna Guðrún Alexandersdóttir skoruðu sex stig hvor og Rebekka Rán Karlsdóttir var með þrjú stig.

Bríet Sif Hinriksdóttir skoraði 21 stig fyrir Grindvíkinga, Tania Pierre-Marie var með 15 stig og 15 fráköst og Elísabeth Ýr Ægisdóttir var með 15 stig og sjö fráköst.

Snæfell siglir lygnan sjó í sjötta sæti deildarinnar með 16 stig, átta stigum á undan Breiðabliki en tólf stigum á eftir Haukum. Næsti leikur Snæfells er á laugardaginn, 14. mars, þegar liðið mætir Keflavík á útivelli.

Öruggur sigur Snæfells