Skallagrímsmenn máttu játa sig sigraða gegn Hamri eftir tvíframlengdan leik, 109-122, þegar liðin mættust í 1. deild karla í körfuknattleik. Leikið var í Borgarnesi í gærkvöldi.

Gestirnir frá Hveragerði höfðu heldur yfirhöndina í upphafi leiks en Skallagrímsmenn fylgdu fast á hæla þeirra. Þegar komið var fram yfir miðjan fyrsta leikhluta náðu Borgnesingar góðum kafla og leiddu með ellefu stigum eftir upphafsfjórðunginn, 30-19.

Skallagrímur leiddi með tíu stigum eða svo lengst af öðrum leikhluta, eða allt til loka fyrri hálfleiks. Þá gerðu gestirnir áhlaup, minnkuðu muninn í tvö stig en Borgnesingar skoruðu síðustu körfu hálfleiksins og leiddu með fimm stigum í hléinu, 52-47.

Skallagrímur jók muninn í ellefu stig í upphafi síðari hálfleik en þá tóku Hamarsmenn við sér. Þeir áttu góðan kafla um miðbik þriðja leikhluta og komust fjórum stigum yfir í stöðunni 66-70. En Borgnesingar áttu lokaorðið í leikhlutanum og fóru með fimm stiga forystu inn í lokafjórðunginn, 77-72. Gestirnir komust yfir þegar fjórði leikhluti var rúmlega hálfnaður og upphófust þá æsispennandi lokamínútur þar sem liðin skiptust á að skora. Þegar 20 sekúndur lifðu leiks var Hamar tveimur stigum yfir en Borgnesingar jöfnuðu metin af vítalínunni í 95-95. Meira var ekki skorað í venjulegum leiktíma og því þurfti að grípa til framlengingar.

Hvergerðingar byrjuðu framlenginguna betur og skoruðu sjö stig í röð. Borgnesingar svöruðu með 9-2 kafla og og jöfnuðu metin í 104-104 þegar fimm sekúndur voru eftir á klukkunni svo grípa þurfti til annarrar framlengingar. Þar áttu Hamarsmenn einfaldlega meira eftir. Borgnesingar hittu ekki úr skotum sínum og skoruðu aðeins tvö stig í annarri framlengingu. Á meðan sigldu gestirnir fram úr og sigruðu að lokum með 13 stigum, 109-122.

Arnar Smári Bjarnason átti stórleik fyrir Skallagrím og skoraði 34 stig. Hjalti Ásberg Þorleifsson skoraði 20 stig og gaf níu stoðsendingar, Kenneth Simms skoraði 16 stig, tók 18 fráköst, gaf átta stoðsendingar og varði sex skot. Kristófer Gíslason var með ellefu stig, Davíð Guðmundsson skoraði tíu stig, Kristján Örn Ómarsson var með átta stig og fimm stoðsendingar, Bergþór Ægir Ríkharðsson sjö stig og fimm fráköst og Almar Örn Björnsson skoraði þrjú stig.

Everage Lee Richardson var atkvæðamestur í liði Hamars og setti upp þrennu. Hann skoraði 32 stig, tók 14 fráköst og gaf ellefu stoðsendingar. Ragnar Jósef Ragnarsson skoraði 28 stig og tók fimm fráköst, Michael Philips skoraði 20 stig, tók 15 fráköst og varði sex skot, Pálmi Geir Jónsson var með 17 stig, níu fráköst og sjö stoðsendingar, Matej Buovac skoraði 16 stig og tók níu fráköst og Björn Ásgeir Ásgeirsson skoraði níu stig.

Skallagrímur situr í sjöunda sæti deildarinnar með sex stig, tveimur stigum meira en Sindri og Snæfell í sætunum fyrir neðan en tíu stigum á eftir Selfyssingum. Næsti leikur Skallagríms er útileikur gegn toppliði Hattar á fimmtudaginn, 12. mars næstkomandi.

Tap eftir tvíframlengdan leik