Skallagrímur vann nauman sigur á Snæfelli í dramatískum Vesturlandsslag í Domino‘s deild kvenna í Borgarnesi í gærkvöldi. Eftir spennandi lokamínútur voru heimakonur stigi yfir þegar lokaflautan gall, 70-69 og fóru því með sigur af hólmi.

Snæfell réði ferðinni í upphafi leiks og skoraði ellefu stig gegn tveimur fyrstu sex mínúturnar. Þá tóku Skallagrímskonur við sér og náðu að jafna metin áður en fyrsti leikhluti var úti, 13-13. Þær höfðu síðan yfirhöndina í öðrum fjórðungi, tókst að slíta sig aðeins frá Snæfelli áður en leikhlutinn var hálfnaður og leiddu með ellefu stigum í hálfleik, 39-28.

Snæfellskonur komu til baka eftir hléið. Hægt en örugglega gerðu þær forystu Skallagríms að engu í þriðja leikhluta. Undi lok leikhlutans komust þær síðan yfir og leiddu með tveimur stigum fyrir lokafjórðunginn, 53-55, en hann átti eftir að verða æsispennandi. Skallagrímskonur minnkuðu muninn í tvö stig en Snæfell jók forystuna á nýjan leik. Þá áttu Hólmarar slæman kafla þar sem boltinn vildi ekki ofan í. Á sama tíma náðu Skallagrímskonur að komast yfir. Snæfell minnkaði muninn í eitt stig þegar örfáar sekúndur lifði leiks en nær komust þær ekki. Skallagrímur sigraði með minnsta mögulega mun, 70-69.

Keira Robinson átti stórleik fyrir Skallagrím, skoraði 30 stig, tók tíu fráköst og gaf átta stoðsendingar. Emilie Hesseldal var með 19 stig og 13 fráköst, Maja Michalska skoraði tíu stig, Mathilde Colding-Poulsen var með fjögur stig og fimm fráköst, Sigrún Sjöfn Ámundadóttir skoraði þrjú stig og gaf fimm stoðsendingar og Gunnhildur Lind Hansdóttir skoraði tvö stig.

Emese Vida var atkvæðamest í liði Snæfells með 25 stig og tólf fráköst. Amarah Coleman skoraði 18 stig, tók sjö fráköst og gaf sex stoðsendingar, Veera Pirttinen skoraði 13 stig og gaf sex stoðsendingar, Rebekka Rán Karlsdóttir skoraði fimm stig, Gunnhildur Gunnarsdóttir var með þrjú stig og fimm stoðsendingar, Björg Guðrún Einarsdóttir skoraði þrjú stig og Anna Soffía Lárusdóttir skoraði tvö stig.

Staða liðanna í deildinni er þannig að Skallagrímskonur sitja í þriðja sæti með 30 stig, jafn mörg stig og Keflavík í sætinu fyrir neðan en hafa leikið einum leik betur.

Snæfell siglir lygnan sjó í sjötta sæti deildarinnar með 14 stig, átta stigum fyrir ofan Breiðablik en 14 stigum á eftir Haukum.

Bæði lið leika næst miðvikudaginn 11. mars. Skallagrímur mætir KR á útivelli en Snæfell fær Grindavík í heimsókn í Stykkishólm.

Dramatískur Vesturlandsslagur