Nýkrýndum bikarmeisturum Skallagríms var kippt rækilega niður á jörðina í gærkvöldi, þegar liðið steinlá gegn Val á útivelli, 107-41. Keira Robinson, Emilie Hesseldal og Maja Michalska léku ekki með Skallagrími í leiknum vegna veikinda, en þær hafa verið lykilmenn í liði Borgnesinga í vetur. Hafði það sitt að segja en tapið var engu að síður mjög stórt.

Skallagrímskonur höfðu yfirhöndina í upphafi leiks, komust mest fjórum stigum yfir og leiddu 8-9 þegar fyrsti leikhluti var hálfnaður. Þá komust Valskonur yfir og létu forystuna ekki af hendi það sem eftir lifði leiks. Valur hafði 14 stiga forskot eftir upphafsfjórðunginn, 28-14 og liðið var komið 30 stigum yfir í hálfleik, 52-22.

Skallagrímskonur fundu sig engan veginn í leiknum, skoruðu aðeins átta stig í öðrum leikhluta, níu í þeim þriðja og tíu í fjórða leikhluta. Á meðan skoruðu Valskonur nánast að vild og forysta þeirra óx jafnt og þétt allt til leiksloka. Þegar lokaflautan gall munaði hvorki meira né minna en 66 stigum á liðunum. Valur sigraði með 107 stigum gegn 41 stigi Skallagríms.

Sigrún Sjöfn Ámundadóttir var atkvæðamest í liði Skallagríms með 17 stig og níu fráköst. Gunnhildur Lind Hansdóttir skoraði tólf stig og tók sex fráköst, Árnína Lena Rúnarsdóttir var með sex stig, Ingibjörg Rósa Jónsdóttir skoraði fjögur stig og Mathilde Colding-Poulsen skoraði tvö.

Helena Sverrisdóttir skoraði 27 stig fyrir Val og tók fimm fráköst. Kiana Johnson var með 16 stig, sex stoðsendingar, fimm fráköst og fimm stolna bolta. Dagbjört Dögg Karlsdóttir skoraði 14 stig og þær Hallveig Jónsdóttir og Dagbjört Samúelsdóttir skoruðu tólf stig hvor.

Skallagrímskonur hafa 24 stig í fjórða sæti deildarinnar, jafn mörg og Keflvíkingar í sætinu fyrir neðan en tveimur stigum á eftir Haukum. Skallagrímur og Haukar mætast einmitt í næstu umferð deildarinnar. Sá leikur fer fram í Hafnarfirði á laugardaginn, 22. febrúar.

Bikarmeistararnir fengu skell