Skallagrímur vann góðan sigur á Snæfelli, 74-71, þegar liðin mættust í spennandi Vesturlandsslag í 1. deild karla í körfuknattleik í gærkveldi. Leikið var í Stykkishólmi.

Hólmarar höfðu undirtökin í upphafi og skoruðu fyrstu sjö stig leiksins. Eftir það tóku Borgnesingar góða rispu og komust í 13-15 seint í fyrsta leikhluta. En Snæfell átti lokaorðið í upphafsfjórðungnum og leiddi með fjórum stigum að honum loknum, 19-15. Hólmarar héldu nokkurra stiga forystu framan af öðrum leikhluta. Þá sneru Skallagrímsmenn taflinu við, komust yfir og höfðu fimm stiga forskot í hálfleik, 36-41.

Snæfell minnkaði muninn í eitt stig í upphafi síðari hálfleiks en Skallagrímsmenn stóðust áhlaupið og héldu forystunni. Þeir tóku síðan góða rispu undir lok þriðja leikhluta og höfðu ellefu stiga forskot fyrir lokafjórðunginn, 51-62. Snæfellingar minnkuðu muninn um helming snemma í fjórða leikhluta og þannig var staðan þar til stutt var eftir af leiknum. Snæfellingar gerðu lokatilraun til að stela sigrinum í blálokin en höfðu ekki erindi sem erfiði. Skallagrímur fór með þriggja stiga sigur af hólmi, 74-71.

Anders Gabriel Andersteg var atkvæðamestur Snæfellinga í leiknum með 23 stig. Brandon Cataldo var með 15 stig og 13 fráköst, Ísak Örn Baldursson skoraði 15 stig og tók sex fráköst, Guðni Sumarliðason var með sjö stig og níu fráköst, Aron Ingi Hinriksson skoraði sjö stig og Benjamin Kil var með fjögur stig.

Hjalti Ásberg Þorleifsson var stigahæstur Skallagrímsmanna með 27 stig og sjö fráköst að auki. Kenneth Simms skoraði 17 stig og reif niður 21 frákast. Kristján Örn Ómarsson var með níu stig og tíu fráköst, Isaiah Coddon var með sjö stig, Davíð Guðmundsson skoraði fimm stig, Davíð Ásgeirsson skoraði fjögur, Arnar Smári Bjarnason var með þrjú og Marinó Þór Pálmason skoraði tvö stig.

Með sigrinum lyfta Skallagrímsmenn sér upp í sjöunda sæti deildarinnar. Þeir hafa sex stig og tveggja stiga forskot á Sinda og Snæfellinga, sem sitja nú á botninum með fjögur stig.

Skallagrímur leikur næst næst á morgun, fimmtudaginn 20. febrúar, þegar liðið mætir Vestra í Borgarnesi. Hólmarar mæta hins vegar Hamri í Hveragerði á föstudaginn, 21. febrúar.

Borgnesingar sigruðu í Vesturlandsslagnum