Baráttan um sæti í úrslitakeppni kvenna í körfuknattleik er í algleymingi eftir að Skallagrímur lagði Keflavík, 83-73 í Borgarnesi í gær.

Skallagrímskonur byrjuðu leikinn af miklum krafti og voru mun öflugri í upphafsfjórðungnum. Þær komust snemma leiks í 12-3 og leiddu með tólf stigum eftir fyrsta leikhluta, 27-15. Skallagrímskonur voru áfram sterkari í öðrum leikhluta og héldu nálægt tíu stiga forystu lengst framan af. Undir lok fyrri hálfleiksins tóku þær svo góða rispu. Skallagrímur fór með 23 stiga forystu inn í hálfleikinn, 57-34 og Borgnesingar komnir í vænlega stöðu.

Gestirnir urðu eitthvað til bragðs að taka og bitu frá sér í síðari hálfleik. Í þriðja leikhluta minnkuðu þær muninn í 14 stig, 70-56 og þær héldu áfram í lokafjórðungnum. Seint í leiknum höfðu Keflvíkingar minnkað forystu Skallagríms í fimm stig og hleypt mikilli spennu í leikinn. En Skallagrímskonur sýndu mikinn karakter og svöruðu fyrir sig með góðum endaspretti sem skilaði þeim tíu stiga sigri, 83-73.

Keira Robinson var atkvæðamest í liði Skallagríms með 32 stig, átta fráköst og fimm stoðsendingar. Maja Michalska skoraði 21 stig og tók sex fráköst. Emilie Hesseldal var öflug á báðum endum vallarins með 13 stig, 16 fráköst, sjö stolna bolta og sex stoðsendingar. Sigrún Sjöfn Ámundadóttir og Mathilde Colding-Poulsen voru með átta stig hvor og Árnína Lena Rúnarsdóttir skoraði eitt stig.

Daniela Morillo skoraði 17 stig, tók tíu fráköst og gaf fimm stoðsendingar í liði Keflavíkur. Þóranna Hodge-Carr var með 13 stig og fimm fráköst og Katla Rún Garðarsdóttir skoraði 13 stig einnig.

Skallagrímskonur sitja í fimmta sæti deildarinnar með 22 stig í harðri baráttu um sæti í úrslitakeppninni um Íslandsmeistaratitilinn. Fyrir ofan eru Keflvíkingar með 24 stig og þá Haukar og KR með 26 og 28 stig. Næsti leikur Skallagrímskvenna er á laugardaginn, þegar þær fá Breiðablik.

Sterkur sigur Skallagríms