Skallagrímur sat eftir með sárt ennið að loknum spennandi leik í 1. deild karla í körfuknattleik í gærkvöldi. Borgnesingar mættu þá liði Álftnesinga í Forsetahöllinni á Álftanesi. Eftir jafnan og spennandi leik náðu heimamenn yfirhöndinni á lokamínútunum og sigruðu að endingu með 14 stigum, 97-83.

Borgnesingar voru heldur sterkari í upphafi leiks en Álftnesingar fylgdu þeim eins og skugginn. Aðeins munaði tveimur stigum eftir upphafsfjórðunginn. Borgnesingar leiddu 19-21. Mikið jafnræði var með liðunum í öðrum leikhluta og þau skiptust á að leiða leikinn. Eftir að hafa kastað forskotinu á milli sín voru það heimamenn sem voru tveimur stigum yfir í hálfleik, 38-36.

Álftnesingar höfðu yfirhöndina framan af fyrri hálfleik en Skallagrímsmenn gættu þess að missa þá ekki of langt fram úr sér. Seint í þriðja leikhluta minnkaði Skallagrímur muninn í eitt stig, en heimamenn áttu lokaorðið og fóru með þriggja stiga forskot inn í lokafjórðunginn, 61-58. Þar fylgdu Borgnesingar fast á hæla þeirra, allt þar til örfáar mínútur lifðu leiks að Álftnesingar náðu góðum endaspretti sem tryggði þeim að lokum 14 stiga sigur, 97-83.

Hjalti Ásberg Þorleifsson var stigahæstur í liði Skallagríms með 17 stig og tók hann fimm fráköst að auki. Kristófer Gíslason skoraði 16 stig og tók sex fráköst, Davíð Ásgeirsson var með ellefu stig, Kenneth Simms skoraði tíu, Bergþór Ægir Ríkharðsson var með átta stig og sex fráköst, Davíð Guðmundsson skoraði átta stig, Isaiah Coddon var með fimm stig, Marinó Þór Pálmason skoraði fjögur stig og gaf sex stoðsendingar og Arnar Smári Bjarnason skoraði fjögur.

Dúi Þór Jónsson skoraði 26 stig fyrir Álftnesinga, tók sex fráköst og gaf fimm stoðsendingar og Samuel Rescott Jr. skoraði 26 stig sömuleiðis, tók fimm fráköst og gaf fimm stoðsendingar. Þorsteinn Finnbogason skoraði 19 stig og Birgir Björn Pétursson var með 16 stig og fimm fráköst.

Skallagrímur situr enn í botnsæti deildarinnar með fjögur stig, jafn mörg og Snæfell og Sindri í sætunum fyrir ofan. Næst leika Borgnesingar á föstudaginn, 7. febrúar, þegar þeir fá topplið Breiðabliks í heimsókn.

Töpuðu á endasprettinum