Skallagrímur tapaði gegn Sindra, 91-73, þegar liðin mættust í 1. deild karla í körfuknattleik á föstudaginn. Leikið var á Höfn í Hornafirði. Fyrir leikinn sátu heimamenn í neðsta sæti deildarinnar en Borgnesingar þar fyrir ofan. Sigur Sindramanna gerði það hins vegar að verkum að nú eru það Borgnesingar sem verma botnsætið.

Skallagrímsmenn byrjuðu leikinn betur og leiddu 5-10 þegar fyrsti leikhluti var hálfnaður. Þá náðu heimamenn yfirhöndinni og leiddu með sex stigum eftir upphafsfjórðunginn, 22-16. Heimamenn voru sterkari í öðrum leikhluta. Þeir byrjuðu á að auka forystu sína í 13 stig og því forskoti héldu þeir meira og minna til hálfleiks. Staðan var 43-31 í hléinu.

Skallagrímur var betra lið vallarins í þriðja leikhluta og tókst að hleypa mikilli spennu í leikinn. Hægt og rólega tókst þeim að minnka forskot Sindra niður í að eins tvö stig, seint í fjórðungnum. Sindri bætti við þremur stigum og leiddi með fimm fyrir lokafjórðunginn. Staðan var 61-56 og leikurinn galopinn. En fjórði leikhlutinn var aldrei neitt sérstaklega spennandi. Heimamenn juku forskotið í tíu stig í upphafi leihlutans og hleyptu Skallagrímsmönnum aldrei nálægt sér. Sindri kláraði leikinn síðan með miklum lokaspretti á síðustu mínútunum og sigraði að endingu með 18 stigum, 91-73.

Kenneth Simms átti stórleik og setti upp tröllatvennu í liði Skallagríms, skoraði 22 stig og reif niður 22 fráköst. Davíð Guðmundsson skoraði 13 stig, Isaiah Coddon var með níu stig, Marinó Þór Pálmason var með átta stig, Hjalti Ásberg Þorleifsson var með sjö stig, Kristján Örn Ómarsson, Kristófer Gíslason og Kristján Örn Ómarsson skoruðu sex stig og Bergþór Ægir Ríkharðsson skoraði tvö stig.

Erikas Jaktsys var atkvæðamestur í liði heimamanna með 25 stig og fimm stolna bolta, Gísli Þórarinn Hallsson skoraði 18 stig og tók átta fráköst, Ivan Kekic skoraði 13 stig, Andrée Fares Michelsson var með tólf stig og fimm fráköst og Ignas Dauksys skoraði tíu stig og tók sex fráköst.

Sem fyrr segir gerðu úrslit leiksins það að verkum að Skallagrímur hrapaði niður á botn deildarinnar. Borgnesingar hafa fjögur stig, eins og Snæfell og Sindri í sætunum fyrir ofan. Næst leika Borgnesingar á morgun, þriðjudaginn 4. febrúar, þegar þeir mæta Álftnesingum á útivelli.

Borgnesingar á botninn