Skallagrímskonur töpuðu naumlega íspennandi leik gegn KR á heimavelli, 72-77, þegar liðin mættust í Domino‘s deild kvenna í körfuknattleik í gærkvöldi. Borgnesingar höfðu yfirhöndina í fyrri hálfleik, en gestirnir úr Vesturbæ Reykjavíkur voru heldur sterkari í þeim síðari og höfðu sigur eftir æsispennandi lokafjórðung.

Skallagrímskonur byrjuðu leikinn betur. Þær höfðu örfárra stiga forskot lengi framan af fyrsta leikhluta, en luku honum með góðum kafla og leiddu 20-14 eftir upphafsfjórðunginn. Þær juku forskot sitt í níu stig snemma í öðrum leikhluta áður en KR-ingar tóku góðan sprett og komust yfir, 27-28. Jafnræði var með liðunum eftir það og staðan jöfn í hálfleik, 38-38.

Skallagrímskonur byrjuðu síðari hálfleikinn illa og skoruðu ekki stig fyrstu fjórar mínúturnar. Á meðan komst KR sex stigum yfir, en Borgnesingar minnkuðu muninn í tvö stig áður en þriðji leikhluti var úti. Staðan var 53-55 fyrir lokafjórðunginn og leikurinn galopinn. Fjórði leikhluti var æsispennandi. KR byrjaði á að auka forskotið í fimm stig en Skallagrímskonur minnkuðu það í eitt stig og komust síðan yfir þegar fjórar mínútur lifðu leiks, 66-65. Gestirnir svöruðu með þremur körfum í röð og leiddu með sex stigum með innan við tvær mínútur á klukkunni. Þegar þarna var komið við sögu hefðu Skallagrímskonur getað farið með sigur af hólmi, en þeim brást bogalistin á lokamínútunum og KR-ingar kláruðu leikinn af vítalínunni, 72-77.

Emilie Hesseldal var atkvæðamest Skallagrímskvenna með 25 stig og 14 fráköst. Keira Robinson skoraði 21 stig, tók sex fráköst og gaf sex stoðsendingar, Maja Michalska skoraði tólf stig og tók sjö fráköst, Sigrún Sjöfn Ámundadóttir skoraði fimm stig, tók átta fráköst og gaf sjö stoðsendingar, Mathilde Colding-Poulsen skoraði fimm stig og þær Gunnhildur Lind Hansdóttir og Árnína Lena Rúnarsdóttir skoruðu tvö stig hvor.

Danielle Rodriguez skoraði 30 stig í liði KR, gaf átta stoðsendingar, tók fimm fráköst og stal fimm boltum. Sanja Orazovic skoraði 15 stig og tók ellefu fráköst, Hildur Björg Kjartansdóttir skoraði 14 stig, Unnur Tara Jónsdóttir skoraði tíu stig og tók fimm fráköst og Margrét Kara Sturludóttir var með sjö stig og sjö fráköst.

Skallagrímskonur eru sem fyrr í mikilli baráttu um sæti í úrslitakeppninni. Þær sitja í fimmta sæti deildarinnar með 20 stig, tveimur stigum á eftir Keflavík og Haukum í sætunum fyrir ofan en með átta stiga forskot á Snæfell. Næsti leika Skallagrímskonur miðvikudaginn 5. febrúar, þegar þær mæta Keflavík í mikilvægum leik í Borgarnesi.

Naumt tap í spennandi leik