Skallagrímskonur eru komnar í undanúrslit Geysisbikarsins í körfuknattleik, eftir stórsigur á ÍR í gærkvöldi, 51-86. Leikið var í Seljaskóla í Reykjavík. Um skyldusigur var að ræða hjá Skallagrími. Borgarnesliðið er í hörkubaráttu í fjórða sæti Domino‘s deildarinnar en ÍR spilar í 1. deild.

Heimaliðið skoraði fyrstu stigin en Skallagrímskonur voru sterkari og komust í 2-8. ÍR-ingar voru ákveðnir í upphafi og jöfnuðu metin í 10-10 en eftir það höfðu Borgnesingar yfirhöndina. Skallagrímur leiddi með tíu stigum eftir upphafsfjórðunginn, 12-22. Þær voru áfram sterkari í öðrum leikhluta, bættu sex stigum til viðbótar við forskot sitt áður en heimaliðið svaraði. ÍR-ingar náðu síðan ágætum kafla seint í fyrri hálfleik þar sem liðið minnkaði muninn í níu stig. En Skallagrímskonur áttu lokaorðið í fyrri hálfleik og fóru með 17 stiga forystu inn í hléið, 23-40.

Síðari hálfleikurinn var síðan algjör einstefna. Skallagrímskonur voru mun sterkari og gátu nánast skorað tvær körfur fyrir hverja körfu heimaliðsins. Eftir þriðja leikhluta voru Borgnesingar komnir með 26 stiga forskot, 34-60 og í rauninni aðeins formsatriði að spila fjórða leikhlutann. Þar bættu Skallagrímskonur enn við forskot sitt og sigruðu að lokum með 35 stigum, 51-86.

Keira Robinson var stigahæst í liði Skallagríms með 21 stig, en hún tók sjö fráköst og gaf sex stoðsendingar að auki. Maja Michalska og Mathilde Colding-Poulsen skoruðu tólf stig hvor, Sigrún Sjöfn Ámundadóttir skoraði ellefu, Emilie Hesseldal var með tíu stig, tólf fráköst og fimm stoðsendingar, Arna Hrönn Ámundadóttir var með sex stig, Gunnhildur Lind Hansdóttir skoraði fimm stig, Ingibjörg Rósa Jónsdóttir var með þrjú stig og þær Karen Munda Jónsdóttir, Heiður Karlsdóttir og Lisbeth Inga Kristófersdóttir skoruðu tvö stig hver.

Nína Jenný Kristjánsdóttir var stigahæsti í liði ÍR með ellefu stig og Arndís Þóra Þórisdóttir skoraði tíu stig og gaf sjö stoðsendingar en aðrar höfðu minna.

Með sigrinum tryggðu Skallagrímskonur sér farseðilinn í undanúrslit Geysisbikarsins, ásamt KR, Val og Haukum. Undanúrslitin verða leikin í Laugardalshöll. Dregið verður til undanúrslita í hádeginu í dag.

Skallagrímskonur á leið í höllina