Snæfellingar biðu lægri hlut gegn liði Álftaness á útivelli, 127-110, þegar liðin mættust í 1. deild karla í körfuknattleik á föstudag. Eins og lokatölur gefa til kynna var leikurinn hraður og bæði lið settu allt sitt púður í sóknarleikinn. Áhorfendur fengu því skemmtilegan og fjörugan leik.

Jafnræði var með liðunum í upphafi leiks og staðan var 11-11 eftir sex mínútna leik. Eftir það náðu Álftnesingar undirtökunum. Þeir skoruðu grimmt það sem eftir lifði upphafsfjórðungsins og leiddu með 38 stigum gegn 25 að honum loknum. Jafnt var á með liðunum í öðrum leikhluta. Snæfellingar náðu að minnka forskot Álftnesinga lítið eitt og þegar flautað var til hálfleiks munaði ellefu stigum á liðunum, 66-54.

Snæfellingar voru öflugri í upphafi síðari hálfleiks, minnkuðu muninn í átta stig áður en heimamenn tóku við sér að nýju. Álftnesingar komust á mikla siglingu í lok þriðja leikhluta og gerðu í raun út um leikinn með góðum leikkafla. Þeir leiddu með 103 stigum gegn 79 fyrir lokafjórðunginn. Snæfellingar náðu að klóra aðeins í bakkann í lokafjórðungnum en tókst ekki að ógna sigri Álftnesinga. Leiknum lauk með 17 stiga sigri heimamanna, 127-110.

Anders Gabriel Andersteg var atkvæðamestur í liði Snæfells með 25 stig og níu fráköst. Brandon Cataldo skoraði 20 stig og tók níu fráköst, Benjamin Kil var með 18 stig og níu fráköst, Eiríkur Már Sævarsson skoraði 14 stig, Aron Ingi Hinriksson var með ellefu stig, Ísak Örn Baldursson skoraði níu stig, Guðni sumarliðason sex, Benjamín Ómar Kristjánsson fjögur og Viktor Brimnir Ásmundarson skoraði þrjú stig.

Dúi Þór Jónsson fór mikinn í liði Álftnesinga, skoraði 31 stig, gaf 15 stoðsendingar og tók sex fráköst. Samuel Prescott jr. skoraði 24 stig, Þorsteinn Finnbogason var með 21 stig, Vilhjálmur Kári Jensson skoraði 19 stig, tók sex fráköst og gaf fimm stoðsendingar, Birgir Björn Pétursson skoraði 13 stig og tók fimm fráköst og Þorgeir Kristinn Blöndal var með tíu stig.

Snæfellingar hafa fjögur stig í sjöunda sæti deildarinnar, jafn mörg og Skallagrímur í sætinu fyrir neðan en fjórum stigum minna en Selfoss. Næst leika Hólmarar gegn Breiðabliki á föstudaginn, 24. janúar. Sá leikur fer fram í Stykkishólmi.

Tap í fjörugum leik