Skallagrímur reið ekki feitum hesti frá viðureign sinni við Hamar, þegar liðin mættust í 1. deild karla í körfuknattleik á föstudag. Leikið var í Hveragerði og það voru heimamenn sem sigruðu örugglega, 110-78.

Borgnesingar byrjuðu leikinn illa, skoruðu ekki stig fyrstu sex mínúturnar og á meðan komust Hvergerðingar í 15-0. Skallagrímsmenn náðu þó ágætis rispu eftir að þeir komust á blað og minnkuðu muninn í tíu stig áður en fyrsti leikhluti var úti, 22-12. Þeir voru ákveðnir í öðrum leikhluta, héldu áfram að minnka muninn og þegar sex mínútur voru til hálfleiks höfðu þeir minnkað muninn í fimm stig, 30-25. En Hvergerðingar enduðu fyrri hálfleikinn á góðum spretti, héldu Borgnesingum stigalausum næstu mínúturnar og leiddu með 18 stigum í hléinu, 43-25.

Hamarsmenn voru öflugri í síðari hálfleik. Þeir juku forskot sitt lítið eitt í þriðja leikhluta og leiddu með 23 stigum að honum loknum. Staðan var 76-53 að honum loknum og brekkan orðin æði brött fyrir Borgnesinga. Þeir náðu ekki að laga stöðuna í lokafjórðungnum. Þvert á móti bættu Hvergerðingar lítið eitt við forskot sitt og sigruðu að lokum með 32 stigum, 110-78.

Kristófer Gíslason var stigahæstur í liði Skallagríms með 18 stig og sjö fráköst. Kenneth Simms skoraði 14 stig og tok níu fráköst, Isaiah Coddon var með 14 stig einnig, Davíð Ásgeirsson og Kristján Örn Ómarsson skoruðu átta stig hvor, Hjalti Ásberg Þorleifsson skoraði sjö stig, Arnar Smári Bjarnason skoraði sex stig og Davíð Guðmundsson skoraði þrjú stig.

Everage Lee Richardsson skoraði 22 stig fyrir Hamar, tók níu fráköst og gaf átta stoðsendingar. Ragnar Jósef Ragnarsson skoraði 22 stig, Michael Philips skoraði 19 stig og tók tíu fráköst og Matej Buovac skoraði 18 stig og tók tólf fráköst.

Skallagrímur hefur fjögur stig í áttunda sæti deildarinnar, jafn mörg og Snæfell í sætinu fyrir ofan en tveimur stigum meira en botnlið Sindra. Næsti leikur Borgnesinga er útileikur gegn toppliði Hattar. Liðin mætast á Egilsstöðum á fimmtudaginn, 23. janúar.

Stórt tap í Hveragerði