Snæfell beið lægri hlut gegn Keflavík, 75-84, þegar liðin mættust í Domino‘s deild kvenna í körfuknattleik í gær. Leikið var í Stykkishólmi og fengu áhorfendur æsispennandi leik þar sem úrslitin réðust ekki fyrr en eftir framlengingu.

Gestirnir höfðu heldur yfirhöndina í upphafi og leiddu með sex stigum um miðjan fyrsta leikhulta. Þá tóku Snæfellskonur góða rispu og komust í 15-14 áður en við tók góður kafli Keflavíkur sem leiddi 15-23 eftir upphafsfjórðunginn. Annar leikhluti var jafn og spennandi, gestirnir leiddu en Snæfellskonur fylgdu fast á hæla þeirra. Þegar flautað var til hálfleiks var staðan 40-42, gestunum í vil.

Snæfellskonur voru mjög öflugar í upphafi síðari hálfleiks. Þær jöfnuðu metin snemma í þriðja leikhluta og liðin fylgdust að næstu mínúturnar. Þá náðu þær góðum kafla og sjö stiga forskoti seint í leikhlutanum, 55-48. En Keflvíkingar svöruðu fyrir sig og jöfnuðu metin fyrir lokafjórðunginn, 57-57 og leikurinn í járnum.

Fjórði leikhluti var æsispennandi. Snæfell hafði tveggja stiga forystu framan af leikhlutanum. Þá náði Keflavík góðri rispu og fimm stiga forskoti í stöðunni 62-67. Snæfellskonur komust stigi yfir þegar tæpar tvær mínútur lifðu leiks en Keflavík sneri taflinu við með tveimur vítaskotum í næstu sókn. Næst var komið að Snæfelli á vítalínunni en aðeins annað skotið fór niður og staðan jöfn, 72-72 þegar innan við hálf mínúta lifði leiks. Spennustigið var hátt og bæði lið áttu eftir að tapa boltanum einu sinni áður en lokaflautan gall. Staðan var þá 72-72 og því varð að grípa til framlengingar. Þar skoruðu Snæfellskonur aðeins þrjú stig, gegn tólf stigum Keflvíkinga og því fór sem fór. Keflavík sigraði með 84 stigum gegn 75 stigum Snæfells.

Amarah Coleman var stigahæst í liði Snæfells með 20 stig og ellefu fráköst að auki. Vera Prttinen skoraði 19 stig, Rebekka Rán Karlsdóttir var með 13 stig, Emese Vida skoraði tíu stig, tók 15 fráköst og gaf sex stoðsendingar, Anna Soffía Lárusdóttir var með níu stig og níu fráköst og Helga Hjördís Björgvinsdóttir skoraði fjögur stig.

Í liði Keflavíkur var Daniella Morillo atkvæðamest með 24 stig, 13 fráköst, sex stoðsendingar og fimm varin skot. Anna Ingunn Svansdóttir skoraði 18 stig og tók fimm fráköst, Þóranna Kika Hodge-Carr var með 14 stig og sjö fráköst, Emelía Ósk Gunnarsdóttir skoraði ellefu stig og Salbjörg Ragna Sævarsdóttir var með tíu stig og átta fráköst.

Eftir leikinn á sunnudag sitja Snæfellskonur í sjötta sæti deildarinnar með átta stig. Þær hafa fjögurra stiga forskot á Breiðablik en eru tíu stigum á eftir Haukum í sætinu fyrir ofan. Næst leika Snæfellskonur miðvikudaginn 15. janúar þegar þær mæta Íslandsmeisturum Vals á útivelli.

Háspenna í Hólminum