Snæfellingar máttu játa sig sigraða á heimavelli gegn Hetti þegar liðin mættust í 1. deild karla í körfuknattleik í gær. Gestirnir frá Egilsstöðum höfðu undirtökin allan leikinn og sigruðu að lokum örugglega, 68-93.

Höttur byrjaði betur og skoraði fyrstu níu stig leiksins en Snæfellingar fundu sig ekki í fyrsta leikhluta. Mest höfðu gestirnir 15 stiga forskot í upphafsfjórðungnum. Heimamenn komu til baka þegar leið á leikhlutann en Höttur hafði tíu stiga forskot að honum loknum, 15-25. Gestirnir voru áfram sterkari í öðrum fjórðungi en Snæfellingar fundu sig engan veginn. Þeir skoruðu aðeins átta stig allan leikhlutann og Höttur jók forskotið í 25 stig áður en flautað var til hálfleiks, 23-48.

Snæfellingar komu ákveðnir til síðari hálfleiks og voru betri í þriðja leikhlutanum. Þar skoruðu þeir 25 stig gegn 22 stigum gestanna og löguðu stöðuna lítið eitt fyrir lokafjórðunginn, 48-70. Munurinn var hins vegar of mikill og gestirnir frá Egilsstöðum sigldu sigrinum örugglega heim í fjórða og síðasta leikhlutanum. Höttur sigraði með 93 stigum gegn 68 stigum Snæfells.

Brandon Cataldo var atkvæðamestur í liði Snæfells með 22 stig og átta fráköst. Guðni Sumarliðason skoraði 14 stig og tók fimm fráköst, Anders Gabriel Andersteg var með ellefu stig og tólf fráköst, Ísak Örn Baldursson skoraði tíu stig, Benjamín Ómar Kristjánsson var með níu stig og Aron Ingi Hinriksson lauk leik með tvö stig og fimm fráköst.

Dino Stipcic fór fyrir liði Hattar með 19 stig, sex fráköst og fimm stoðsendingar. Marcus Jermaine Van skoraði 19 stig og reif niður 20 fráköst, Matej Karlovic skoraði 14 stig og David Guardia Ramos var með ellefu stig og sjö fráköst.

Snæfellingar hafa fjögur stig í áttunda sæti deildarinnar, jafn mörg stig og Skallagrímur í sætinu fyrir ofan en tveimur stigum meira en botnlið Sindra. Næsti lekur Snæfells er útileikur gegn Álftanesi föstudaginn 17. janúar næstkomandi.

Gestirnir of stór biti