Fyrsta stjórn BFSÍ ásamt þingforseta og framkvæmdastjóra ÍSÍ. F.v.: Líney Rut Halldórsdóttir framkvæmdastjóri, Albert Ólafsson, Astrid Daxböck, Ólafur Gíslason nýkjörinn formaður, Ásdís Lilja Hafþórsdóttir, Guðmundur Örn Guðjónsson, Alfreð Birgisson og Hafsteinn Pálsson 2. varaforseti ÍSÍ.

Bogfimisamband Íslands stofnað

Nýtt sérsamband innan ÍSÍ, Bogfimisamband Íslands, var stofnað í gær á degi fullveldisins í Íþróttamiðstöðinni í Laugardal. Með stofnun félagsins eru sérsambönd ÍSÍ orðin 33 talsins. Bogfimiíþróttin á Íslandi á rætur sínar að rekja til íþróttafélaga um íþróttir fatlaðra og fyrstu skipulögðu æfingar í bogfimi hér á landi voru hjá Íþróttafélagi fatlaðra í Reykjavík. Bogfimi var þó alltaf bæði stunduð af fötluðu og ófötluðu íþróttafólki. Bogfiminefnd ÍSÍ hefur verið starfandi innan vébanda ÍSÍ um langt skeið og haft umsjón með útbreiðslu og uppbyggingu íþróttarinnar hér á landið, undir leiðsögn ÍSÍ. Undanfarin ár hefur svo verið unnið markvisst að stofnun sérsambands um bogfimi enda íþróttin vaxið hratt á landsvísu. Íþróttin er nú stunduð í tíu íþróttafélögum innan vébanda níu íþróttahéraða.

Ólafur Gíslason var kjörinn fyrsti formaður sambandsins en aðrir í stjórn BFSÍ voru kjörin til fjögurra ára þau Guðmundur Örn Guðjónsson varaformaður, Ásdís Lilja Hafþórsdóttir ritari, Albert Ólafsson gjaldkeri og Haraldur Gústafsson meðstjórnandi til tveggja ára. Varamenn stjórnar eru Astrid Daxböck, Alfreð Birgisson og Kelea Quinn.

Lög sambandsins voru samþykkt samhljóða og kynning fór fram á drögum að afreksstefnu nýja sambandsins. Afreksstefnan verður unnin áfram af stjórn og lögð fyrir á næsta formannafundi BFSÍ til kynningar.

Bogfimi er ólympísk íþróttagrein og þó að Íslandi hafi ekki enn teflt fram keppanda í bogfimi á Ólympíuleikum þá hefur Ísland átt þátttakendur á alþjóðlegum mótum, svo sem Evrópuleikunum árið 2015 og 2019. Keppendur í bogfimi áttu til að mynda góðu gengi að fagna á Smáþjóðaleikunum í San Marínó 2017. Á stofnþingi sambandsins á sunnudaginn var lesið upp bréf frá Alþjóðabogfimisambandinu þar sem Albert Ólafssyni og Sveinbjörgu Rósu Sumarliðadóttur, í Bogfimifélaginu Boganum í Kópavogi, var óskað innilega til hamingju með tvö heimsmet sem þau settu í Heimsbikarmóti í opnum flokki í Berlín í júlí síðastliðnum. Líney Rut Halldórsdóttir framkvæmdastjóri ÍSÍ afhenti Alberti viðurkenningar, sem fylgdu erindi Alþjóðasambandsins, en Sveinbjörg Rósa mun fá sínar viðurkenningar síðar þar sem hún komst ekki til þingsins. Þess má geta að hún er frá Ferjubakka í Borgarhreppi.

Líkar þetta

Fleiri fréttir

Jólablaðið í næstu viku

Miðvikudaginn 18. desember kemur Jólablað Skessuhorns út. Það er stærsta blað ársins hjá útgáfunni og jafnframt síðasta tölublað ársins. Vegna... Lesa meira