Hljómur, kór FEBAN, ásamt Lárusi Sighvatssyni. Ljósm. Björn Lúðvíksson.

Syngja í Hörpu á fullveldisdaginn

Samkórinn Hljómur, sem er kór FEBAN á Akranesi, leggur í vikunni land undir fót og stefnir á að halda tónleika í Eldborgarsal Hörpunnar í Reykjavík á fullveldisdaginn sunnudaginn 1. desember. Þar mun kórinn syngja ásamt sjö öðrum kórum af landinu. Lárus Sighvatsson er stjórnandi Hljóms: „Á haustdögum komu skilaboð frá Garðari Cortes um að hann væri búinn að panta stóra salinn í Hörpu til tónleikahalds á fullveldisdaginn 1. desember og óskaði hann eftir þátttöku Hljóms í þessum tónleikum. Tilefnið er ærið enda þessi merkilegi dagur í sögu þjóðar að gleymast mörgum og því finnst okkur þetta gott framtak,“ segir Lárus í samtali við Skessuhorn. „Ákváðu kórfélagar strax að taka þessu boði. Hafa því verið stífar æfinga undanfarnar vikur. Tónleikarnir verða með þeim hætti að sungin verða ellefu kórlög, bæði ættjarðarlög og eftir íslensk tónskáld. Að auki syngja kórarnir fjögur lög þar sem gestir í sal eru hvattir til að syngja með í fjöldasöng og síðan mun tónleikunum ljúka með fjórum lögum sem tengjast jólum.“

Tónleikarnir í Hörpu hefjast klukkan 16 og verða þegar mest er 300 söngvarar á sviði Elborgarsalarins. Allir kórar fá nokkra miða til sölu og segir Lárus að miðaverði sé stillt í hóf, en það er 3000 krónur.

Kór FEBAN er nú á sínu 29. starfsári og er starfsemin með miklum krafti. „Fastir liðir í starfi kórsins er að syngja tvisvar á vetri í messu í Akraneskirkju. Þá tekur kórinn á móti eða heimsækir kór eldriborgara í Hveragerði og einnig koma saman til skiptis einu sinni á vori FEBAN kórinn og kórar frá Borgarnesi og Kópavogi. Í lok hvers starfsárs er svo kóramót með kórum frá Selfossi, Mosfellsbæ, Hafnarfirði og Reykjanesbæ og verður það mót næst á Selfossi í maí. Í dag eru skráðir félagar í Hljómi 43 og æft tvisvar í viku. Formaður kórstjórnar er Rögnvaldur Einarsson.

Líkar þetta

Fleiri fréttir