Í Reykholti. Ljósm. Guðlaugur Óskarsson.

Hátíð í Reykholti á fullveldisdegi

Snorrastofa og Reykholtskirkja taka höndum saman og fagna fullveldisdegi á fyrsta sunnudegi í aðventu, 1. desember næstkomandi. Hátíðin hefst með messu í kirkjunni klukkan 14 og hátíðarkaffi að henni lokinni í safnaðar- og sýningarsal. Klukkan 16 býður Snorrastofa til fyrirlestrar dr. Auðar Hauksdóttur fyrrverandi forstöðumanns Stofnunar Vigdísar Finnbogadóttur um viðhorf Dana til íslenskrar  tungu og bókmennta. Fyrirlesturinn verður fluttur í bókhlöðunni. Um efni hans segir Auður: „ Á síðari hluta átjándu aldar tóku hugmyndir um þjóðerni að ryðja sér til rúms í Danmörku og víðar. Í tengslum við þjóðernismyndun Dana gegndu íslenskar bókmenntir veigamiklu hlutverki, þar sem þær greindu frá sögu Norðurlanda og voru skrifaðar á íslensku. Þá naut íslensk tunga virðingar meðal danskra fræðimanna vegna hreinleika síns. Í fyrirlestrinum verður gerð grein fyrir þessum aðstæðum og hvaða þýðingu þær höfðu fyrir afstöðu Íslendinga til eigin tungu og menningar.

Auður Hauksdóttir lauk doktorsprófi í dönsku frá Kaupmannarhafnarháskóla árið 1999 auk fjölbreytilegrar menntunar fram að því. Hún hefur komið víða við á starfsferli sínum, meðal annars kennslu í Háskóla Íslands og frá 2001-2017 var hún forstöðumaður Stofnunar Vigdísar Finnbogadóttur. Þá hefur hún ritað ótal greinar og flutt fyrirlestra í tengslum við störf sín. Hún var sæmd Dannebrogsorðu af fyrstu gráðu árið 2017 fyrir framlag til rannsókna og kennslu og að stuðla að jákvæðum tengslum Íslands og Danmerkur. Auður er nú fulltrúi Borgarbyggðar í stjórn Snorrastofu. Segja má, að ákjósanleg aðstaða Reykholtskirkju-Snorrastofu rúmi í hvívetna komandi hátíð og með henni beri samstarf þessara tveggja tengdu en um margt ólíku stofnana ríkulegan ávöxt til hagsbóta fyrir samfélagið, sem umlykur þær. Þá sakar ekki af þessu tilefni að minna á sýninguna „Árið 1918 í Borgarfirði“, sem Snorrastofa setti upp á 100 ára afmæli fullveldisins og stendur enn í hátíðarsal gamla héraðsskólans í Reykholti. Að hátíðinni lokinni er áætlað að opna húsnæði gamla hérðasskólans fyrir þá, sem hefðu áhuga á að skoða sig þar um.

Líkar þetta

Fleiri fréttir