Skallagrímur laut í lægra haldi gegn sterku liði Vestra, 90-110, þegar liðin mættust í 1. deild karla í körfuknattleik. Leikið var í Borgarnesi í gærkvöldi.

Vestramenn skoruðu fyrstu fimm stig leiksins áður en Skallagrímur breytti stöðunni í 6-5. Eftir það náðu gestirnir yfirhöndinni og leiddu með fimm stigum eftir fyrsta leikhluta, 20-15. Gestirnir höfðu yfirhöndina í öðrum leikhluta. Þeir komust mest 14 stigum yfir skömmu fyrir hálfleik en Skallagrímur minnkaði muninn í níu stig áður en flautað var til hálfleiks, 44-53.

Borgnesingar minnkuðu muninn í sex stig í upphafi þriðja leikhluta en eftir það juku Vestramenn forskot sitt að nýju. Þeir héldu þægilegu 10 til 14 stiga forskoti til loka leikhlutans og leiddu 69-83 fyrir lokafjórðunginn. Skallagrímsmenn minnkuðu muninn í átta stig í upphafi fjórða leikhlutans en nær komust þeir ekki það sem eftir lifði leiks. Hægt en örugglega juku gestirnir forystuna í 20 stig áður en flautað var til leiksloka. Vestri sigraði með 110 stigum gegn 90 stigum Skallagríms.

Isaiah Coddon var stigahæstur í liði Skallagríms með 16 stig og sex fráköst. Davíð Guðmundsson skoraði 15 stig og tók fimm fráköst, Hjalti Ásberg Þorleifsson skoraði 15 stig einnig og Kristján Örn Ómarsson sömuleiðis. Kristófer Gíslason skoraði tíu stig og tók sex fráköst, Marinó Þór Pálmason va rmeð átta stig, níu fráköst og átta stoðsendingar, Almar Örn Björnsson var með fimm stig og fimm stoðsendingar og þeir Jón Hrafn Baldvinsson, Arnar Smári Bjarnason og Ásbjörn Baldvinsson skoruðu tvö stig hver.

Reynsluboltinn Nebosja Knazevic átti stórleik fyrir Vestra og var að öðrum ólöstuðum besti maður vallarins. Hann skoraði 31 stig, tók átta fráköst og gaf níu stoðsendingar. Nemanja Knazevic kom honum næstur í liði Vestra með 20 stig og 13 fráköst, Hilmir Hallgrímsson var með 17 stig og sex fráköst, Matic Macek skoraði 13 stig, tók fimm fráköst og gaf sex stoðsendignar og Ingimar Aron Baldursson skoraði tíu stig.

Skallagrímur situr á botni deildarinnar, án sigurs eftir fyrstu fjóra leiki vetrarins. Næsti leikur Borgnesinga er útileikur gegn Selfyssingum á mánudaginn, 28. október næstkomandi.

Tap gegn Vestra