Snæfellskonur unnu góðan sigur á Grindavík, 63-66, í hörkuleik í Domino‘s deild kvenna í körfuknattleik. Leikið var í Grindavík í gærkvöldi. Heimaliðið hafði undirtökin lengi vel en í lokafjórðungnum sneru Snæfellskonur taflinu sér í vil og höfðu að lokum sigur.

Snæfell hafði undirtökin í fyrsta leikhluta, komst mest níu stigum yfir en leiddi með þremur þegar leikhlutinn var úti. Grindvíkingar voru sterkari í öðrum fjórðungi, komust snemma yfir og leiddu mest með átta stigum í stöðunni 37-29. Á lokamínútum fyrri hálfleiks minnkuðu Snæfellskonur muninn og aðeins þrjú stig skildu á milli liðanna í hléinu, 39-36.

Grindavíkurliðið var sterkara framan af þriðja leikhluta, hélt alltaf nokkurra stiga forystu en Snæfell var þó aldrei langt undan. Hólmarar náðu góðri rispu undir lok leikhlutans og voru aðeins einu stigi á eftir fyrir lokafjórðunginn, 53-52. Í fjórða leikhlutanum var Snæfellsliðið einfaldlega sterkara. Eftir að liðin höfðu skipst á forystunni í upphafi leikhlutans áttu Snæfellskonur góðan leikkafla. Þær komust sjö stigum yfir eftir miðjan fjórðunginn og héldu forystunni allt til loka leiks. Snæfell hafði þrigga stiga sigur, 63-66.

Chandler Smith var atkvæðamest í liði Snæfells með 21 stig, átta stoðsendingar, sex fráköst og fimm stolna bolta. Veera Pirttinen skoraði 18 stig, tók sjö fráköst og gaf sex stoðsendingar og Emese Vida skoraði tíu stig og tók tólf fráköst. Tinna Guðrún Alexandersdóttir var með níu stig, Gunnhildur Gunnarsdóttir sex stig og sjö fráköst og Helga Hjördís Björgvinsdóttir skoraði tvö stig.

Snæfell hefur fjögur stig í sjötta sæti deildarinnar eftir fjórar umferðir, jafn mörg og Skallagrímur og Keflavík í sætunum fyrir ofan. Næst leikur Snæfell miðvikudaginn 30. október næstkomandi, þegar liðið mætir Haukum í Stykkishólmi.

Öflugri á lokamínútunum