Skagamenn gerðu jafntefli við HK, 1-1, þegar liðin mættust í næstsíðustu umferð Pepsi Max deildar karla í knattspyrnu. Leikið var í Kópavogi í gær.

Leikurinn byrjaði fjörlega og HK-ingar voru heilt yfir frískari framan af fyrri hálfleik. Emil Atlason komst einn í gegn eftir mistök í vörn ÍA eftir rúmlega korters leik en skaut beint á Árna Snæ Ólafsson í markinu. Skömmu síðar átti Alexander Freyr Sindrason skot af markteignum en Árni Snær varði vel frá honum. Á 20. mínútu átti Arnþór Ari Atlason þrumuskot í stöng Skagamanna eftir þunga sókn heimamanna.

Stuttu síðar náðu Skagamenn snarpri sógkn, sem endaði með því að Bjarki Steinn Bjarkason átti skot úr teignum sem small í stönginni og aftur fyrir endamörk.

Skömmu fyrir lok fyrri hálfleiks fengu heimamenn dauðafæri, þegar Emil skallaði boltann rétt yfir markið eftir góða fyrirgjöf frá Herði Árnasyni.

Heimamenn komu mjög ákveðnir til síðari hálfleiks. Árni Snær varði vel frá Birki Snæ Ingasyni á 52. mínútu en kom engum vörnum við fjórum mínútum síðar þegar HK-ingar komust yfir. Birnir Snær Ingason átti skot í varnarmann, boltinn hrökk út í teiginn á Arnþór Ara sem smellti honum þéttingsfast í markhornið vinstra megin. Heimamenn voru nálægt því að bæta öðru marki við tíu mínútum síðar, þegar Ásgeir Marteinsson átti hörkuskot að marki sem Árni Snær varði vel.

Meiri þungi færðist í sóknarleik Skagamanna síðasta hálftímann, án þess þó að skila mörgum opnum marktækifærium. Sindri Snær Magnússon fékk þó gott færi á 67. mínútu en skot hans úr vítateignum hafnaði í varnarmanni. Undir lok leiksins dró til tíðinda, þegar brotið var á Marcusi Johanssen í teignum og Skagamönnum dæmd vítaspyrna. Tryggvi Hrafn Haraldsson fór á punktinn og skoraði með góðu skoti.

Litlu munaði að Skagamönnum tækist að stela sigrinum í uppbótartíma. Fyrst átti Viktor Jónsson skot rétt framhjá af stuttu færi og síðan átti Tryggvi skot sem einnig fór rétt framhjá markinu.

Lokatölur voru 1-1 og Skagamenn sitja eftir leikinn í 8. sæti deildarinnar með 27 stig, jafn mörg og HK í sætinu fyrir ofan en stigi á undan Val. Næsti leikur Skagamanna fer fram laugardaginn 28. september næstkomandi, þegar þeir mæta Víkingi R. á Akranesvelli. Sá leikur er jafnframt lokaleikur tímabilsins.

Jöfnuðu á ögurstundu