Víkingur Ó. vann öruggan sigur á toppliði Fjölnis, 4-1, þegar liðin mættust í Inkasso deild karla í knattspyrnu á föstudagskvöld. Leikið var í Ólafsvík.

Snemma leiks dró til tíðinda þegar Ólafsvíkingar fengu vítaspyrnu eftir að brotið var á Guðmundi Magnússyni. Harley Willard fór á punktinn, skoraði örugglega með skoti í vinstra hornið og kom Víkingi yfir.

Ólafsvíkingar voru mun ákveðnari í öllum sínum aðgerðum framan af fyrri hálfleiknum og komust í 2-0 á 30. mínútu leiksins. Þeir sendu langan bolta fram völlinn. Atli Gunnar Guðmundsson, markvörður Fjölnis, fór í skógarhlaup út úr markinu. Sorie Barrie pressaði á hann og boltinn endaði hjá Harley sem sendi hann fyrir markið á Barrie sem átti ekki í vandræðum með að leggja hann í netið. Áfram voru heimamenn mun sterkari og skoruðu þriðja mark sitt á 41. mínútu þegar Guðmundur Magnússon skoraði eftir snyrtilega fyrirgjöf Martins Kuittinens og Ólafsvíkingar komnir í yfirburðastöðu í hálfleik.

Fjölnir átti erfitt með að byggja upp sóknir framan af síðari hálfleik, heimamenn voru þéttir til baka og beittu skyndisóknum. Það var ekki fyrr en á 68. mínútu að dró til tíðinda þegar vítaspyrna var dæmd á Franko Lalic, markvörð Víkings. Albert Brynjar Ingason tók spyrnuna og skoraði af miklu öryggi. Fjölnismenn lágu á Ólafsvíkingum eftir markið án þess þó að skapa sér nein færi.

Á 72. mínútu fengu Ólafsvíkingar aðra vítaspyrnu sína í leiknum þegar brotið var á Guðmundi eftir hornspyrnu. Guðmundur tók vítið sjálfur og skoraði með hnitmiðuðu skoti og kom Víkingi í 4-1. Fleiri mörk voru ekki skoruð og urðu það því lokatölur leiksins.

Víkingur situr í 6. sæti deildarinnar með 27 stig eftir 18 leiki, stigi á eftir Keflavík en einu stigi fyrir ofan Fram, sem er einmitt næsti andstæðingur Ólafsvíkinga. Leikur Víkings og Fram verður leikinn á Framvelli föstudaginn 30. ágúst næstkomandi.

Víkingur skellti toppliðinu