ÍA sigraði ÍBV, 2-1, í 18. umferð Pepsi deildar karla í knattspyrnu. Leikið var á Akranesvelli á laugardaginn. Var þetta fyrsti sigur Skagaliðsins síðan 6. júlí og Skagamenn því aftur komnir á sigurbraut. Eyjamenn eru hins vegar fallnir.

Eyjamenn fengu dauðafæri í upphafi leiks þegar Benjamin Prah lagði boltann á Gary Martin sem skaut beint á Árna Snæ Ólafsson í marki Skagamanna. Það var þó ÍA liðið sem var sterkara í fyrri hálfleik. Skagamenn áttu allnokkrar góðar sóknir og voru líklegri til að skora. Eftir rúmlega hálftíma leik þrumaði Viktor Jónsson í þverslána af stuttu færi þegar boltinn barst til hans í teignum. Skagamenn sóttu stíft í lok fyrri hálfleiks og uppskáru mark á 44. mínútu leiksins. Tryggvi Hrafn Haraldsson sendi boltann inn á teig á Viktor sem skallaði hann fyrir markið aftur. Einar Logi Einarsson mætti á fjærstöngina og skallaði boltann yfir línuna af stuttu færi. Skagamenn leiddu því með einu marki gegn engu þegar flautað var til hálfleiks.

Áfram voru Skagamenn sterkari eftir hléið og hefðu getað komist í 2-0 snemma í síðari hálfleik. Halldór Páll Geirsson, markvörður ÍBV, missti boltann frá sér eftir að hafa gripið langt innkast. Þaðan barst hann út á Sindra Snæ Magnússon í teignum en hann kom skotinu ekki í gegnum þéttan varnarmúrinn. Skömmu síðar átti Hörður Ingi Gunnarsson frábæra sendingu fram völlinn á Tryggva sem tók boltann glæsilega niður, lagði hann út á Aron Kristófer Lárusson sem þrumaði yfir markið.

Á 61. mínútu náði Gonzalo Zamorano góðum spretti fram völlinn í skyndisókn Skagamanna sem endaði með því að Sigurður Arnar Magnússon braut á honum innan teigs og vítaspyrna dæmd. Tryggvi fór á punktinn og skoraði af miklu öryggi, sendi Halldór í vitlaust horn.

Skömmu síðar hefðu Skagamenn átt að komast í 3-0. Hörður sendi boltann fyrir frá hægri á Tryggva sem kom boltanum í átt að markinu þar sem hann virtist vera á leið í markið. Þar potaði Gonzalo honum yfir línuna en markið var hins vegar dæmt af þar sem hann var greinilega rangstæður.

Eftir þetta tóku Eyjamenn aðeins að sækja í sig veðrið og minnkuðu muninn á 72. mínútu. Gary Martin keyrði upp völlinn, var kominn á móti varnarmanni vinstra megin við vítateigsbogann þegar hann lét vaða og lyfti boltanum glæsilega yfir Árna Snæ í markinu. Stemningin fyrst eftir markið var mjög undarleg. Engin fagnaðarlæti voru meðal áhorfenda og enginn leikmaður fór að fagna markinu með Gary, sem sjálfur stillti fagnaðarlátum í hóf. Fleiri mörk voru ekki skoruð og leiknum lauk því með 2-1 sigri ÍA.

Skagamenn sitja í 6. sæti deildarinnar með 25 stig, jafn mörg og HK og stigi meira en Valur, en bæði liðin eiga leik til góða í dag. Eyjamenn eru hins vegar fallnir.

Næsti mætir ÍA toppliði deildarinnar og erkifjendunum í KR á útivelli sunnudaginn 1. september næstkomandi.

Skagamenn felldu ÍBV