Skagakonur máttu sætta sig við 0-4 tap gegn toppliði Þróttar þegar liðin mættust í 15. umferð Inkasso deildar kvenna í knattspyrnu á föstudag. Leikið var á Akranesi.

Jafnræði var með liðunum í fyrri hálfleik. Gestirnir voru meira með boltann og sóttu nokkuð stíft en Skagakonur vörðust afar vel, héldu góðu skipulagi og voru þéttar til baka svo Þróttarar komust lítt áleiðis. Þegar færi gafst átti ÍA nokkrar álitlegar sóknir eftir að hafa unnið boltann. Besta færi fyrri hálfleiks fékk Eyrún Eiðsdóttir strax á 13. mínútu. Hún vann boltann af varnarmönnum Þróttar við miðjuna, geystist upp völlinn og skaut að marki rétt innan teigs en Friðrika Arnardóttir varði vel í horn.

Besta færi Þróttar framan af fyrri hálfleik var eftir að þær komust upp að endamörkum og renndu boltanum fyrir markið, en Aníta Ólafsdóttir varði vel í tvígang. Það var síðan rétt fyrir hálfleikinn að Linda Líf Boama skoraði fyrir Þrótt. Skagakonur skölluðu hornspyrnu frá markinu. Sigmundína Þorgrímsdóttir fékk boltann úti vinstra megin, sendi fyrir á Lindu sem smellti skoraði með föstu skoti upp í nærhornið. Virkilega vel afgreitt færi hjá Lindu en súrt í broti fyrir Skagakonur sem höfðu leikið afar vel í fyrri hálfleik.

Þróttarar mættu mun ákveðnari til síðari hálfleiks og tóku stjórn leiksins í sínar hendur. Liðið óð í færum og eitthvað varð undan að láta. Á 60. mínútu kom Margrét Sveinsdóttir Þrótti í 0-2 með góðum skalla eftir hornspyrnu. Þróttarar létu kné fylgja kviði og Lauren Wade skoraði þriðja mark leiksins aðeins tveimur mínútum síðar. Eftir laglegt þríhyrningaspil við Lindu skaut hún að marki, Aníta varði en boltinn barst aftur á Lauren sem skoraði í annari tilraun.

Það var síðan Linda sem innsiglaði 0-4 sigur Þróttar undir lok leiksins eftir fallega stungusendingu inn fyrir vörnina og gulltryggði liðinu farseðilinn í Pepsi Max deild kvenna að ári.

ÍA situr í 6. sæti deildarinnar með 15 stig eftir 15 leiki, jafn mörg og Fjölnir og stigi meira en Grindavík og Augnablik í sætunum þar fyrir neðan. Næsti leikur ÍA er afar mikilvægur útileikur gegn Augnabliki í botnbaráttu deildarinnar. Hann verður leikinn föstudaginn 6. september næstkomandi.

Kaflaskipt gegn toppliðinu