ÍA og Fjölnir gerðu 1-1 jafntefli þegar liðin mættust í 11. umferð Inkasso deildar kvenna í knattspyrnu. Leikið var á Akranesi í gærkvöldi

Skagakonur hafa átt erfitt uppdráttar að undanförnu og höfðu tapað fimm deildarleikjum í röð fyrir leikinn. Gengi Fjölnis hefur verið upp og ofan á tímabilinu. Bæði lið eru í baráttunni í neðri hluta deildarinanr og því ljóst að hvorugt mátti við því að gefa tommu eftir í leiknum í gær.

Liðin mættu enda ákveðin til leiksins og töluverð barátta var í fyrri hálfleik. Gestirnir úr Fjölni sköpuðu sér nokkur ákjósanleg marktækifæri náðu forystunni á 31. mínútu.

Mist Þormóðsdóttir Grönvold tók aukaspyrnu á miðjum vallarhelmingi Skagakvenna. Hún var ekkert að tvínóna við hlutina heldur lét vaða á markið af um 40 metra færi. Skot hennar fór í þverslá og niður, boltinn skoppaði upp í loftið og Íris Ósk Valmundsdóttir átti ekki í vandræðum með að skalla hann yfir línuna af örstuttu færi. Fjölnir leiddi í hálfleik með einu marki gegn engu.

Skagakonur fengu dauðafæri til að jafna metin eftir um klukkustundar leik. Veronica Líf Þórðardóttir átti þá frábæra sendingu fyrir markið frá hægri á Erlu Karitas Jóhannesdóttur en Erla hitti boltann illa á fjærstönginni og náði því ekki nægilega góðu skoti. Skagakonur fengu ekki mörg færi í síðari hálfleik en tókst að jafna metin á 83. mínútu. Fríða Halldórsdóttir tók hornspyrnu frá hægri. Boltinn sveif alla leið á fjærstöngina á Evu Maríu Jónsdóttur sem komst fram fyrir varnarmann Fjölnis og skoraði með viðstöðulausu skoti af stuttu færi og jafnaði metin í 1-1.

Þannig urðu lokatölur leiksins og Skagakonur hafa því tólf stig í áttunda sæti deildarinnar, jafn mörg og Fjölnir í sætinu fyrir neðan en stigi á eftir Grindavík, sem er einmitt næsti mótherji Skagakvenna. Leikur ÍA og Grindavíkur fer fram suður með sjó föstudaginn 9. ágúst næstkomandi.

Jöfnuðu á lokamínútunum