ÍA og Grindavík gerðu 1-1 jafntefli þegar liðin mættust suður með sjó í tólftu umferð Pepsi Max deildar karla í knattspyrnu í gærkvöldi.

Bæði lið fengu sín færi í upphafi leiks. Skagamenn komust í dauðafæri þegar þeir hirtu boltann af Grindvíkingum í öftustu línu en tókst ekki að nýta það. Heimamenn fengu síðan dauðafæri eftir slæma sendingu til baka og skömmu síðar áttu þeir þrumuskalla í þverslána eftir hornspyrnu.

Það var síðan Hörður Ingi Gunnarsson sem kom ÍA yfir á 26. mínútu leiksins. Jón Gísli Eyland Gíslason átti sendingu fyrir markið. Boltinn barst út í teiginn vinstra megin á Hörð sem skoraði með viðstöðulausu skoti í bláhornið.

En Skagamenn voru ekki lengi yfir, því strax í næstu sókn náðu Grindvíkingar að jafna. Alexander Veigar Þórarinsson komst upp að endamörkum vinstra megin, sendi boltann út í teiginn á Oscar Conde sem kláraði af stuttu færi.

Tryggvi Hrafn Haraldsson átti hörkuskot að marki Grindvíkinga skömmu fyrir hálfleikinn en Vladan Djogatovic varði frá honum alveg út við stöng. Í næstu sókn áttu Grindvíkingar hörkuskot sem smaug rétt framhjá markinu. Staðan 1-1 í hléinu.

Tryggvi fékk dauðafæri til að koma ÍA yfir á 55. mínútu leiksins en Vladan varði vel frá honum. Eftir klukkustundar leik komust Grindvíkingar einir í gegn en Sigurður Bjartur Hallsson þrumaði boltanum hárfínt yfir markið. Tíu mínútum síðar var hann aftur á ferðinni þegar hann átti skalla af markteig en Árni Snær Ólafsson varði glæsilega frá honum.

Skagamenn voru heldur sterkari það sem eftir lifði leiks en tókst ekki að skapa sér nein opin marktækifæri. Grindvíkingar fengu besta færið á lokamínútunum en skot Arons Jóhannssonar eftir skyndisókn fór af varnarmanni og aftur fyrir endalínu. Lokatölur leiksins urðu því 1-1 jafntefli.

Skagamenn sitja í þriðja sæti deildarinnar með 21 stig, stigi á eftir Breiðabliki í sætinu fyrir neðan en tveimur stigum á undan Stjörnunni og FH í sætunum fyrir neðan. Næst leika Skagamenn gegn KA, sunnudaginn 21. júlí næstkomandi. Sá leikur fer fram á Akureyri.

Jafnt suður með sjó