Víkingur Ó. tyllti sér á topp 1. deildar karla í knattspyrnu eftir góðan útisigur á Fjölni í gærkvöldi, 1-3.

Ólafsvíkingar byrjuðu af miklum krafti og sköpuðu strax hættu upp við mark heimamanna. Þeir héldu áfram að sækja og komust yfir á 14. mínútu leiksins. Sallieu Tarawallie fékk boltann fyrir utan teig Fjölnismanna. Hann var ekkert að tvínóna við hlutina heldur smellti boltanum upp í samskeytin. Glæsilegt mark hjá Sallieu.

Ólsarar voru áfram sterkari í og það var því verðskuldað þegar Martin Kuittinen bætti við öðru marki fyrir Víking á 34. mínútu. Leikurinn róaðist eftir markið og Ólafsvíkingar leiddu með tveimur mörkum gegn engu þegar flautað var til hálfleiks.

Síðari hálfleikur byrjaði ekki vel fyrir Ólafsvíkinga. Á 50. mínútu fékk Fjölnir vítaspyrnu eftir að Valdimar Ingi Jónsson féll í teignum. Albert Brynjar Ingason fór á punktinn og skoraði úr góðri spyrnu. Franco Lalic veðjaði á rétt horn í marki Ólafsvíkinga en spyrna Alberts var föst og nákvæm.

Meira jafnræði var með liðunum í síðari hálfleik og leikurinn var galopinn eftir að heimamenn minnkuðu muninn. Hvorugu liði tókst hins vegar að skapa sér nein dauðafæri. Á 76. mínútu fengu Ólafsvíkingar hornspyrnu. Eftir smá at í teignum barst boltinn fyrir fætur Ívars Arnar Árnasonar sem renndi honum í netið og kom Víkingi í 1-3. Ólafsvíkurliðið náði betri tökum á leiknum eftir að þeir juku forskot sitt. Þeir voru yfirvegaðir inni á vellinum og sigldu sigrinum heim.

Eftir leikinn hefur Víkingur 13 stig á toppi 1. deildarinnar, jafn mörg stig og Fjölnir en hafa leikið einum leik minna. Næsti leikur Ólafsvíkinga er heimaleikur gegn Keflavík á mánudaginn, þjóðhátíðardaginn 17. júní.

Ólafsvíkingar tylltu sér á toppinn