ÍA og Fylkir skildu jöfn, 2-2, þegar liðin mættust í Pepsi Max deild karla í knattspyrnu í gærkvöldi. Leikið var í Árbænum.

Skagamenn byrjuðu leikinn af krafti og komust yfir strax á 13. mínútu leiksins. Eftir langt innkast skölluðu Fylkismenn boltann út úr teignum. Hörður Ingi Gunnarsson lagði boltann fyrir sig með einni snertingu og þrumaði honum síðan upp í þaknetið. Skagamenn voru sterkari í fyrri hálfleik og sköpuðu sér fjölmörg færi, þar af nokkur dauðafæri sem ekki tókst að nýta og staðan því 0-1 í hálfleik.

Fylkismenn fóru rækilega yfir sín mál í hléinu og mættu ákveðnir til síðari hálfleiks. Þeir jöfnuðu metin strax á 52. mínútu þegar Einar Logi Einarsson varð fyrir því óláni að skora sjálfsmark þegar hann ætlaði að skalla boltann frá eftir hornspyrnu. Heimamenn efldust við markið og stjórnuðu gangi mála inni á vellinum. Þeir komust síðan í forystuna á 71. mínútu. Góð sókn endaði með því að Sam Hewson sendi boltann inn fyrir vörnina á Geoffrey Castillion sem lagði hann snyrtilega framhjá Árna Snæ Ólafssyni í marki ÍA.

Fylkismenn voru sterkari eftir markið en Skagamenn reyndu að setja meira púður í sóknina til að freista þess að jafna metin þegar færðist nær leikslokum. Þeir vildu fá vítaspyrnu í uppbótartíma þegar boltinn fór í hönd Fylkismanns og þaðan aftur fyrir endamörk en ekkert var dæmt nema hornspyrnu. Skömmu síðar tókst Skagamönnum hins vegar að jafna metin. Boltinn var sendur frá hægri til vinstri inn í teiginn þar sem Lars Marcus Johanesn stýrði honum inn á markteiginn fyrir Óttar Bjarna Guðmundsson sem henti sér á boltann og jafnaði metin fyrir ÍA. Fylkismenn voru síðan nálægt því að stela sigrinum eftir hornspyrnu á lokaandartökum leiksins en þrumuðu boltanum framhjá. Jafntefli varð því niðurstaðan og stig á hvort lið.

ÍA situr í þriðja sæti deildarinnar með fjögur stig eftir fyrstu tvo leiki sumarsins, jafn mörg og Fylkir og KR í sætinum fyrir ofan og Breiðablik í sætinu fyrir neðan. Næst leika Skagamenn á laugardaginn, 11. maí, þegar þeir mæta Íslandsmeisturum Vals á útivelli.

Jöfnuðu í uppbótartíma