Nýjar og breyttar golfreglur tóku gildi um áramótin síðustu. Breytingarnar eru töluvert margar, eða samtals 45 talsins og miða að því að nútímavæða reglur leiksins. Golfklúbburinn Oddur í Garðabæ hefur tekið saman þær tuttugu reglubreytingar sem helst hafa áhrif á leik kylfinga. Við þá samantekt er stuðst hér. Tuttugu helstu breytingarnar eru eftirfarandi:

Leitartími er styttur úr fimm mínútum og niður í þrjár. Ef bolti hreyfist við leit skal hann lagður aftur á fyrri stað, vítalaust. Ef bolti er sokkinn er vítalaus lausn utan brauta. Bolti er látinn falla úr hnéhæð í stað axlarhæðar áður og við mælingu þegar bolti er látinn falla skal notuð lengsta kylfan, (önnur en pútter). Ekki er leyfilegt að taka sér stöðu á rangri flöt en lausn er vítalaus. Vítalaust er ef leikmaður slær bolta í sjálfan sig eða útbúnað sinn og ef bolti er tvísleginn skal það talið sem eitt högg, vítalaust. Tilfallandi snerting á sandi í glompu er leyfð, fjarlægja má lausung hvar sem er og lagfæra má svo til allar skemmdir á flötum. Taka má lausn úr glompu gegn tveimur vítahöggum. Vatnstorfærur kallast vítasvæði og leyfilegt er að snerta vatn eða jörð innan vítasvæðis. Ef bolti hreyfist á flöt eftir að hafa verið merktur, lyft og lagður niður aftur skal hann lagður aftur á fyrri stað, vítalaust. Ef bolti er hreyfður fyrir slysni á flötinni skal hann sömuleiðis lagður aftur á fyrri stað, vítalaust. Ekki er heimilt að leggja kylfu niður til aðstoðar við miðun og kylfuberi má sömuleiðis ekki aðstoða við miðun. Leyfilegt er að hafa flaggstöng í holu þegar púttað er og ef bolti skorðast við flaggstöng telst hann í holunni.

Ef kylfingar og aðrir áhugasamir vilja kynna sér breytingarnar á golfreglunum nánar er vakin athygli á því að þær er að finna ásamt skýringum á vef Golfsambands Íslands.

Töluverðar breytingar á golfreglum