Skallagrímur heimsótti Val í fallbaráttuslag Domino‘s deildar karla í körfuknattleik í gærkvöldi. Skallagrímur þurfti nauðsynlega á sigri að halda til að eiga áfram möguleika á að halda sæti sínu í deildinni. Valsmenn gátu hins vegar með sigri fellt Skallagrím og þar með tryggt sér áframhaldandi veru í Domino‘s deildinni. Eftir nokkuð jafnan og spennandi fyrri hálfleik sigldi Valur fram úr í þeim síðari og vann að lokum öruggan sigur, 100-77. Þar með er ljóst að Skallagrímsmenn eru fallnir og leika í 1. deildinni að ári.

Heimamenn byrjuðu leikinn af krafti ,höfðu yfirhöndina í fyrsta leikhluta og leiddu með tíu stigum að honum loknum, 26-16. Skallagrímsmenn voru betri í öðrum fjórðungi og söxuðu hægt en örugglega á forskot Valsmanna allan leikhlutann. Þegar mínúta var eftir af fyrri hálfleik voru Skallagrímsmenn komnir aðeins einu stigi frá Val. Heimamenn áttu hins vegar lokaorðið og leiddu með tveimur stigum í hléinu, 47-45.

Valsmenn komu mjög ákveðnir til síðari hálfleiks á meðan Skallagrímsliðið fann sig ekki fyrst eftir hléið. Þegar þriðji leikhluti var hálfnaður höfðu heimamenn aukið forskot sitt í 16 stig. Þá tóku Borgnesingar við sér og minnkuðu muninn í átta stig fyrir lokafjórðunginn, 67-59. Jafnt var á með liðunum í upphafi fjórða leikhluta og munurinn hélst að kalla óbreyttur fyrstu mínúturnar. Þegar um fimm mínútur voru eftir af leiknum náðu Valsmenn hins vegar undirtökunum í leiknum, juku forskot sitt nokkuð skart og unnu að lokum 23 stiga sigur, 100-77. Þar með eru Skallagrímsmenn fallnir en Valsmenn leika áfram í Domino‘s deildinni að ári.

Bjarni Guðmann Jónsson var atkvæðamestur í liði Skallagríms með 22 stig og tíu fráköst. Aundre Jackson skoraði 20 stig, Domagoj Samac var með 15 stig og sex fráköst og Matej Buovac skoraði 13 stig.

Dominique Deon Rambo skoraði 24 stig, gaf átta stoðsendingar og stal fimm boltum í liði Vals. Nicholas Schlitzer skoraði 21 stig, tók fimm fráköst og gaf sex stoðsendingar, Austin Bracey var með 21 stig einnig og Aleks Simenov skoraði 18 stig.

Skallagrímur situr í ellefta sæti með átta stig þegar tvær umferðir eru eftir. Næst leikur liðið gegn Tindastóli í Borgarnesi á sunnudaginn, 10. mars næstkomandi.

Borgnesingar fallnir