Skallagrímur og Breiðablik mættust í botnslag Domino‘s deildar kvenna í körfuknattleik í gær. Leikið var í Kópavogi. Blikar höfðu undirtökin meira og minna allan leikinn, þó Skallagrímskonur væru aldrei langt undan. Fór svo að lokum að heimakonur höfðu betur, 81-72.

Breiðablik byrjaði leikinn betur en Skallagrímskonur komust yfir um miðjan fyrsta leikhluta. Þá tóku heimakonur forystuna að nýju og leiddu með fimm stigum eftir upphafsfjórðunginn, 23-18. Þær héldu nokkurra stiga forskoti framan af öðrum leikhluta og náðu að auka forystuna lítið eitt fyrir hléið. Breiðablik leiddi með átta stigum í hálfleik, 42-34.

Skallagrímskonur komu til baka eftir fimm mínútur af síðari hálfleik og minnkuðu muninn í eitt stig seint í leikhlutanum. Þá tóku Blikar smá rispu og höfðu sex stiga forskot fyrir lokafjórðunginn. Jafnræði var með liðunum framan af fjórða leikhluta. Heimakonur héldu nokkurra stiga forystu þar til seint í leiknum að þær bættu nokkrum stigum við forskotið og sigruðu að lokum með níu stigum, 81-72.

Shequila Joseph var setti upp tröllatvennu fyrir Skallagrím. Hún skoraði 24 stig, reif niður 22 fráköst og gaf fimm stoðsendingar að auki. Maja Michalska skoraði 14 stig og tók níu fráköst, Sigrún Sjöfn Ámundadóttir skoraði 14 stig og Ines Kerin var með 13 stig og sex fráköst.

Sana Orazovic skoraði 19 stig og tók átta fráköst í liði Breiðabliks, Ivory Crawford var með 18 stig og ellefu fráköst og þær Thelma Lind Ásgeirsdóttir og Þórdís Jóna Kristjánsdóttir skoruðu tíu stig hvor.

Skallagrímskonur hafa tólf stig í næstneðsta sæti deildarinnar og eru með átta stiga forskot á Breiðablik sem situr í fallsætinu. Næst leika þær gegn Keflavík í Borgarnesi, laugardaginn 9. mars næstkomandi.

Tap í botnslagnum