Snæfell heimsótti Keflavík í stórleik 23. umferðar Domino‘s deildar kvenna í gærkvöldi. Leikurinn var jafn og spennandi frá upphafi til enda en Snæfell var þó feti framar nánast allan tímann. En Keflvíkingar fylgdu alltaf fast á hæla Hólmara og náðu undir lokin að stela sigrinum. Lokatölur voru 79-77 fyrir Keflavík.

Snæfellskonur höfðu heldur yfirhöndina í upphafi leiks og leiddi með þremur stigum eftir fyrsta leikhluta, 22-25. Þær náðu síðan góðum kafla í öðrum leikhluta og ellefu stiga forystu, en Keflvíkingar náðu að gera forskot Hólmara að nánast engu áður en annar leikhluti var úti. Staðan í hálfleik var 41-42, Snæfelli í vil.

Jafnt var á með liðunum eftir hléið og aldrei munaði meira en örfáum stigum. Keflavík komst yfir með síðustu körfu leikhlutans og fór með tveggja stiga forskot inn í lokafjórðunginn, 64-62. Snæfellskonur náðu forystunni á nýjan leik snemma í fjórða leikhluta og komust í 67-65. En Keflvíkingar svöruðu með góðri rispu og komust fjórum stigum yfir á lokamínútum leiksins. Snæfellskonur minnkuðu muninn í tvö stig en þar við sat. Keflavík sigraði 79-77.

Kristen McCarthy fór fyrir liði Snæfells með 31 stig, 13 fráköst og sjö stoðsendingar. Angelika Kowalska var með 21 stig og Rebekka Rán Karlsdóttir skoraði 13 stig.

Í liði Keflvíkinga var Brittany Dinkins atkvæðamest með 35 stig, 14 fráköst og átta stoðsendingar en Bryndís Guðmundsdóttir skoraði 14 stig og tók sjö fráköst.

Úrslit leiksins þýða að Snæfell fellur niður í fimmta sæti deildarinnar með 26 stig. Baráttan um fjórða sætið er hörð, en það tryggir sæti í úrslitakeppninni. Stjarnan situr í því fjórða með 28 stig og þessi lið mætast einmitt í næstu umferð á laugardaginn. Sá leikur fer fram í Stykkishólmi.

Dramatík suður með sjó