Snæfellingar heimsóttu Selfyssinga í 1. deild karla í körfuknattleik á föstudagskvöld. Eftir fremur jafnan fyrri hálfleik tóku heimamenn að síga fram úr í þeim síðari og unnu að lokum örugglega, 73-55.

Jafnt var á með liðunum í upphafi leiks. Um miðjan fyrsta leikhluta, í stöðunni 8-6, tóku Selfyssingar góða rispu þar sem þeir skoruðu sjö stig í röð. Þá var komið að Snæfellingum, sem minnkuðu muninn í tvö stig með góðum kafla áður en leikhlutinn var úti, 19-17. Snæfellingar jöfnuðu í 26-26 eftir fjórar mínútur í öðrum fjórðungi en eftir það misstu þeir flugið. Þeir skoruðu ekki stig það sem eftir lifði leikhlutans. En heimamenn áttu sömuleiðis frekar erfitt uppdráttar það sem eftir lifði fyrri hálfleiks. Þeir skoruðu ekki nema sjö stig og staðan því 33-26 í hálfleik.

Selfyssingar voru öflugri í þriðja leikhluta og bættu jafnt og þétt við forskot sitt. Þegar leikhlutinn var úti voru þeir komnir með þægilega 17 stiga forystu, 53-36 og með pálmann í höndunum. Snæfellingar náðu aðeins að spyrna við fótum í lokafjórðungnum. Þeir minnkuðu muninn í tólf stig áður en nær komust þeir ekki. Með fínum lokaspretti tryggðu Selfyssingar sér 18 stiga sigur, 73-55.

Jón Páll Gunnarsson var stigahæstur í liði Snæfells með 23 stig, auk þess að taka sex fráköst og stela fimm boltum. Darrel Flake var með ellefu stig og átta fráköst og Andri Þór Hinriksson var með ellefu stig einnig.

Marvin Smith Jr. var atkvæðamestur í liði Selfyssinga með 21 stig og 14 fráköst. Hlynur Hreinsson var með 13 stig en aðrir höfðu minna.

Snæfell situr á botni deildarinnar með tvö stig þegar tveir leikir eru eftir af mótinu, jafn mörg og lið Sindra í sætinu fyrir ofan. Næst leika Snæfellingar gegn toppliði Þórs frá Akureyri. Sá leikur fer fram í Stykkishólmi á föstudaginn, 8. mars.

Misstu heimamenn fram úr sér eftir hléið