Skallagrímur tapaði gegn Þór Þ. þegar liðin mættust í Domino‘s deild karla í körfuknattleik í gær. Leikið var í Borgarnesi. Eftir jafnan fyrri hálfleik voru gestirnir einfaldlega sterkari í þeim síðari og fóru að lokum með sigur af hólmi, 74-89.

Borgnesingar höfðu yfirhöndina í framan af fyrsta leikhluta en Þórsarar voru aldrei langt undan. Seint í leikhlutanum náðu Skallagrímsmenn góðum spretti og sjö stiga forystu, en gestirnir svöruðu og komust yfir áður en upphafsfjórðungurinn var úti, 20-21. Mikið jafnræði var með liðunum næstu mínúturnar. Gestirnir náðu góðri rispu um miðjan annnan leikhluta og átta stiga forskoti. Þá svöruðu Skallagrímsmenn með góðum kafla þar sem þeir tóku forystuna og leiddu með þremur stigum í hléinu, 43-40.

Þórsarar jöfnuðu metin þegar þriðji leikhluti var hálfnaður og tóku síðan forystuna. Þeir höfðu yfirhöndina það sem eftir lifði leikhlutans og leiddu með fimm stigum fyrir lokafjórðunginn, 65-60. Gestirnir voru síðan einfaldlega sterkari það sem eftir lifði leiks. Þeir léku afar góða vörn og Skallagrímsmenn komust lítt áleiðis. Forysta Þórs jókst hægt en örugglega í lokafjórðungnum og þeir höfðu að lokum 15 stiga sigur, 74-89.

Bjarni Guðmann Jónsson var atkvæðamestur í liði Borgnesinga með 19 stig og níu fráköst. Aundre Jackson var með 13 stig og níu fráköst og Björgvin Hafþór Ríkharðsson skoraði tólf stig, tók fimm fráköst og gaf fimm stoðsendingar.

KinuRochford var atkvæðamestur í liði gestanna með 23 stig og tólf fráköst, Nikolas Tomsick skoraði 20 stig og gaf tólf stoðsendingar, Halldór Garðar Hermannsson var með 16 stig og fimm stoðsendingar, Jaka Brodnik skoraði ellefu stig og tók sjö fráköst og Ragnar Örn Bragason var með tíu stig.

Skallagrímur situr í ellefta sæti deildarinnar með átta stig í harðri fallbaráttu, fjórum stigum á eftir Val í sætinu fyrir ofan þegar þrír leikir eru eftir. Þessi tvö lið mætast í algjörum fallslag fimmtudaginn 7. mars. Leikið verður í Reykjavík. Þar verða Borgnesingar að krækja í sigur til að eiga möguleika á að halda sæti sínu í deildinni.

Að duga eða drepast hjá Borgnesingum