Skallagrímskonur þurftu að játa sig sigraðar gegn Val þegar liðin mættust í Domino‘s deild kvenna í körfuknattleik í gærkvöldi. Leikið var í Borgarnesi. Valur hafði yfirhöndina í fyrri hálfleik en Skallagrímsliðið fylgdi þeim eins og skugginn. Skallagrímskonur voru fáliðaðar, með aðenis sjö leikmenn á skýrslu og á endanum kom það í bakið á þeim. Þær höfðu ekki orku til að halda í við Valsliðið. Gestirnir stungu af eftir hléið og unnu að lokum öruggan sigur, 59-89.

Valur byrjaði betur og komst í 12-4 snemma leiks. Þá tóku Skallagrímskonur aðeins við sér og staðan eftir fyrsta leikhluta var 15-21. Borgnesingar fylgdu gestunum hvert fótmál í öðrum fjórðungi og náðu að minnka muninn í þrjú stig skömmu fyrir hléið. Valur átti hins vegar lokaorðið í fyrri hálfleik og leiddi með sex stigum þegar hálfleiksflautan gall, 34-40.

Það var síðan í þriðja leikhluta sem Valskonur stungu af. Þær skoruðu hvorki fleiri né færri en 27 stig í leikhlutanum gegn 17 stigum Skallagríms. Staðan fyrir lokafjórðunginn var 51-67 fyrir Val. Skallagrímskonur náðu sér engan veginn á strik í fjórða leikhluta og skoruðu aðeins átta stig. Á meðan skoruðu gestirnir 22 stig og juku forskot sitt enn frekar. Lokatölur urðu 59-89 fyrir Val.

Shequila Joseph var atkvæðamest í liði Skallagríms með 25 stig og ellefu fráköst. Árnína Lena Rúnarsdóttir skoraði 13 stig og tók fimm fráköst og Sigrún Sjöfn Ámundadóttir var með ellefu stig, 14 fráköst og fimm stoðsendingar.

Bergþóra Holton Tómasdóttir skoraði 22 stig og tók fimm fráköst í liði Vals. Heather Butler skoraði 18 stig og gaf sjö stoðsendingar og Guðbjörg Sverrisdóttir var með 18 stig einnig.

Skallagrímur hefur 12 stig í sjöunda sæti deildarinnar, fjórum stigum minna en Haukar í sætinu fyrir ofan en tíu stigum á undan botnliði Breiðabliks. Neðstu liðin tvö, Skallagrímur og Breiðablik, mætast í Kópavogi miðvikudaginn 6. mars.

Voru stungnar af í síðari hálfleik