Snæfellskonur náðu sér ekki á strik gegn Val þegar liðn mættust í Domino‘s deild kvenna í körfuknattleik í gærkvöldi. Leikið var í Stykkishólmi. Gestirnir náðu yfirhöndinni snemma leiks og stjórnuðu ferðinni allan tímann. Að lokum fór svo að Valur sigraði með 80 stigum gegn 65 stigum Snæfells.

Snæfellskonur fundu sig ekki í upphafsfjórðungnum, skoruðu aðeins sjö stig allan leikhlutann gegn 19 stigum Vals. Annar leikhluti var rólegur framan af. Um miðbik hans tóku Valskonur að síga lengra fram úr og leiddu með 23 stigum í hálfleik, 22-45.

Svipað var uppi á teningnum fyrst eftir hléið. Gestirnir juku forystuna lítið eitt í þriðja leikhluta og Snæfellskonur virkuðu aldrei líklegar til að koma sér inn í leikinn. Valur leiddi með 26 stigum fyrir lokafjórðunginn, 37-63 og úrslit leiksins ráðin. Það var ekki fyrr en í fjórða leikhlutanum sem Snæfellsliðið tók við sér. Jafnt og þétt tókst Hólurum að minnka muninn en það var bara of seint. Þeim tókst að minnka forskot gestanna niður í 15 stig en nær komust þær ekki. Lokatölur urðu 65-80 fyrir Val.

Kristen McCarthy átti prýðilegan leik fyrir Snæfell. Hún skoraði 29 stig, tók 19 fráköst g stal fimm boltum. Gunnhildur Gunnarsdóttir var með ellefu stig og sex fráköst en aðrar höfðu minna.

Helena Sverrisdóttir fór fyrir liði Vals. Hún var með 20 stig, 17 fráköst og átta stoðsendingar. Heather Butler skoraði 17 stig og tók tíu fráköst, Ásta Júlía Grímsdóttir var með 13 stig og níu fráköst og Hallveig Jónsdóttir skoraði ellefu stig.

Snæfell situr eftir leikinn í fjórða sæti deildarinnar með 24 stig, jafn mörg og Stjarnan í sætinu fyrir neðan. Næst leikur Snæfell gegn Breiðabliki miðvikudaginn 27. febrúar. Sá leikur fer einnig fram í Stykkishólmi.

Einstefna í Stykkishólmi