Skallagrímskonur máttu játa sig sigraðar gegn Haukum, 59-72, þegar liðin mættust í Domino‘s deild kvenna í körfuknattleik í gærkvöldi. Leikið var í Borgarnesi.

Leikurinn fór hægt af stað og engin stig voru skoruð fyrstu þrjár mínúturnar, eða þar til gestirnir úr Hafnarfirði komust á blað. Skallagrímskonur fundu sig hins vegar engan veginn í fyrsta leikhluta. Þær voru stigalausar fyrstu átta mínútur leiksins og skoruðu aðeins fjögur stig í upphafsfjórðungnum gegn 15 stigum Hauka. Eftir því sem leið á annan leikhluta komust Skallagrímskonur betur inn í leikinn. Þær minnkuðu forskot Hauka í sex stig seint í fjórðungnum en Haukar áttu lokaorðið og leiddu með átta stigum í hléinu, 23-31.

Spenna færðist í leikinn í þriðja leikhluta. Hægt og sígandi minnkuðu Skallagrímskonur muninn í þrjú stig. Haukar svöruðu en Borgnesingar áttu lokaorðið í þriðja leikhluta og sáu til þess að aðeins tvemiur stigum munaði fyrir lokafjórðunginn, 46-48. Mikið jafnræði var með liðunum í upphafi fjórða leikhluta. Haukar leiddu með örfáum stigum en Skallagrímskonur fylgdu þeim eins og skugginn. Það var síðan um miðjan fjórða leikhluta að gestirnir tóku að síga fram úr og unnu að lokum 13 stiga sigur, 59-72.

Sigrún Sjöfn Ámundadóttir var atkvæðamest í liði Skallagríms með 23 stig og níu fráköst og Ines Kerin skoraði 16 stig, tók fimm fráköst og gaf sex stoðsendingar.

Eva Margrét Kristjánsdóttir skoraði 24 stig og tók ellefu fráköst fyrir Hauka, Þóra Kristín Jónsdóttir var með tólf stig, fimm fráköst og sjö stoðsendingar og Anna Lóa Óskarsdóttir skoraði tólf stig.

Skallagrímur hefur tólf stig í sjöunda sæti deildarinnar, tveimur stigum minna en Haukar í sætinu fyrir ofan en tíu stigum meira en botnlið Breiðabliks. Næst mæta Borgnesingar nýkrýndum bikarmeisturum Vals. Sá leikur fer fram í Borgarnesi miðvikudaginn 27. febrúar næstkomandi.

Slök byrjun og slæmur endir