Tap eftir spennandi undanúrslitaleik gegn Val

Snæfell og Val mættust í stórskemmtilegum leik í undanúrslitum bikarsins í Laugardalshöll í gærkvöldi. Snæfellskonur höfðu yfirhöndina bróðurpart leiksins en gríðarsterkt lið Vals hélt sér alltaf inni í leiknum. Valur tók síðan öll völd á vellinum í upphafi lokafjórðungsins. Sá leikkafli varð til þess að Valskonur fóru með sigur af hólmi, 83-72 og mæta Stjörnunni í úrslitaleik bikarsins á laugardaginn.

Snæfellskonur byrjuðu leikinn af miklum krafti, spiluðu mjög góða vörn sem skilaði mörgum auðveldum körfum á hinum enda vallarins. Kristen McCarthy var að öðrum ólöstuðum besti maður vallarins í upphafi leiks. Hún skoraði ellefu af 24 stigum Snæfells í fyrsta leikhluta og stal hvorki fleiri né færri en fimm boltum fyrstu tíu mínúturnar. Snæfell leiddi með tíu stigum eftir upphafsfjórðunginn, 24-14. Valskonur skoruðu fyrstu sex stig annars leikhluta og minnkuðu muninn í 24-20. Þá náði Snæfell góðum leikkafla og komst í kjölfarið ellefu stigum yfir, 31-20. Valsliðið svaraði fyrir sig og náði forystunni þegar 40 sekúndur voru eftir af fyrri hálfleik og leiddu með þremur stigum í hléinu, 45-42. Helena Sverrisdóttir fór mikinn í liði Vals í fyrri hálfleiknum, þar sem hún skoraði 20 af 45 stigum liðsins.

Snæfell náði forystunni í upphafi síðari hálfleiks en Valur fylgdi þeim eins og skugginn. Liðin skiptust á að skora og leikurinn var æsispennandi. Snæfell leiddi með tveimur stigum fyrir fjórða og síðasta leikhlutann, 60-58. Valskonur tóku stjórn leiksins í sínar hendur í upphafi lokafjórðungsins. Þær spiluðu afar góða vörn, skoruðu fyrstu tólf stig leikhlutans og komust þar með tíu stigum yfir. Snæfellskonur reyndu sem mest þær máttu að svara fyrir sig en Valskonur stigu ekki feilspor á lokamínútunum og höfðu að lokum níu stiga sigur, 83-72. Það verður því Valur sem mætir Stjörnunni í úrslitaleik bikarsins næstkomandi laugardag.

Kristen McCarthy átti stórleik fyrir Snæfell á báðum endum vallarins. Hún skoraði 24 stig, tók níu fráköst, gaf sjö stoðsendingar og stal hvorki fleiri né færri en tíu boltum. Gunnhildur Gunnarsdóttir skoraði 15 stig og Berglind Gunnarsdóttir var með ellefu.

Helena Sverrisdóttir fór fyrir liði Vals, skoraði 33 stig, tók tólf fráköst og gaf sjö stoðsendingar. Heather Butler kom henni næst með 27 stig en aðrar komust ekki í tvegja stafa tölu á stigatöflunni.

Snæfell úr leik í bikarnum