Skallagrímsmenn bundu enda á 13 leikja taphrinu í Domino‘s deild karla í körfuknattleik þegar þeir lögðu Breiðablik á föstudagskvöld, 91-90. Var þetta fyrsti sigur Borgnesinga í deildinni síðan í október og því afar kærkominn.

Skallagrímsmenn höfðu undirtökin í upphafi leiks en Blikar voru aldrei langt undan. Seint í leikhlutanum munaði aðeins einu stigi á liðunum en góð rispa Borgnesinga þeim sex stiga forskoti eftir fyrsta leikhluta, 30-24. Gestirnir létu finna fyrir sér í upphafi annars leikhluta og náðu forystunni. Skallagrímsmenn svöruðu og komust yfir að nýju en Breiðablik átti lokaorðið og leiddi með tveimur stigum í hléinu, 49-51.

Bæði Borgnesingum og Blikum gekk illa að skora í upphafi síðari hálfleiks. Fyrir vikið var áfram mikið jafnræði með liðunum. Gestirnir náðu smá rispu seint í þriðja leikhluta og leiddu með sex stigum fyrir lokafjórðunginn, 65-71. Blikar höfðu yfirhöndina framan af fjórða leikhlutanum og leiddu með fimm stigum þegar sex mínútur voru eftir. Þá tóku Skallagrímsmenn á sig rögg, komust fjórum stigum yfir og leiddu allt til leiksloka. Blikar minnkuðu muninn en komust ekki nær en sem nam einu stigi. Lokatölur í Borgarnesi 91-90, Skallagrími í vil.

Domagoj Samac var atkvæðamestur í liði Skallagríms með 26 stig og níu fráköst. Bjarni Guðmann Jónsson skoraði 22 stig og tók tíu fráköst, Matej Buovac var með 19 stig og sex stoðsendingar og Gabríel Sindri Möller skoraði tíu stig.

Erlendur Ágúst Stefánsson var stigahæstur í liði gestanna með 27 stig, Snorri Vignisson skoraði 19 stig og reif niður 17 fráköst og Árni Elmar Hrafnsson var með 17 stig.

Skallagrímur hefur sex stig í ellefta sæti deildarinnar og hefur fjögurra stiga forskot á botnlið Breiðabliks. Borgnesingar eru fjórum stigum á eftir Val í sætinu fyrir ofan en eiga leik til góða. Næst leikur Skallagrímur í kvöld, mánudaginn 4. febrúar, þegar þeir fá Hauka í heimsókn í Borgarnes.

Taphrina Skallagríms á enda