Skallagrímur krækti í mikilvæg stig í Domino‘s deild kvenna þegar liðið sigraði Breiðablik, 84-74, í Borgarnesi í gærkvöldi.

Borgnesingar byrjuðu leikinn af krafti og komust í 13-3 áður en upphafsfjórðungurinn var hálfnaður. Þá tóku Blikar við sér og minnkuðu muninn, en Skallagrímskonur höfðu áfram yfirhöndina og leiddu með sjö stigum eftir fyrsta leikhluta, 24-17. Þegar leið á annan leikhluta tóku Skallagrímskonur góðan sprett og náðu að auka forskot sitt í 17 stig áður en flautað var til hálfleiks. Staðan í hléinu var 50-33.

Skallagrímskonur voru mjög öflugar í þriðja leikhluta og rúlluðu yfir gestina. Jafnt og þétt juku þær foryustna í 26 stig, leiddu 74-48 eftir þriðja leikhluta og úrslit leiksins ráðin. Skallagrímskonur náðu sér ekki á strik í lokafjórðungnum en það kom ekki að sök. Blikar náðu að minnka muninn í tíu stig seint í leiknum en gerðu aldrei neina alvöru atlögu að forystu Skallagrímskvenna. Lokatölur urðu 84-74, Skallagrími í vil.

Ines Kerin var stigahæst í liði Skallagríms með 24 stig og gaf hún fimm stoðsendingar að auki. Brianna Banks var með 23 stig, sex fráköst og átta stoðsendingar, Sigrún Sjöfn Ámundadóttir 13 stig og tíu fráköst og Shequila Joseph 13 stig og átta fráköst.

Í liði gestanna var Ivory Crawford með 21 stig, sjö fráköst og fimm stolna bolta. Thelma Lind Ásgeirsdóttir skoraði 15 stig, Sanja Orazovic skoraði 13 stig, tók sex fráköst og gaf sjö stoðsendingar og Björk Gunnarsdóttir var með tíu stig og fimm stoðsendingar.

Með sigrinum kræktu Skallagrímskonur í tíunda stig sitt í vetur. Liðið er í áttunda sæti, tveimur stigum fyrir ofan Hauka í sætinu fyrir neðan en átta stigum frá Stjörnunni í sætinu fyrir ofan. Næst leika Skallagrímskonur miðvikudaginn 23. janúar þegar þær mæta toppliði Keflavíkur suður með sjó.

Mikilvægur sigur Skallagríms